کانگریس صدر ملکارجن کھڑگے کی سرجری کے بعد اسپتال سے چھٹی، عوام اور کارکنان کی نیک خواہشات پر پارٹی کا اظہارِ تشکر

کھڑگے کے بیٹے اور کرناٹک کے وزیر پریانک کھڑگے نے بدھ کو ایکس پر پوسٹ کرتے ہوئے کہا تھا کہ والد کو پہلے سے طے منصوبے کے تحت اسپتال میں داخل کیا گیا اور ڈاکٹروں نے پیس میکر لگانے کا مشورہ دیا۔ انہوں نے بتایا کہ کھڑگے کی حالت مستحکم ہے اور وہ خود کو بہتر محسوس کر رہے ہیں۔ پریانک نے عوامی تشویش اور دعاؤں کے لیے شکریہ ادا کیا۔

پارٹی ذرائع نے پی ٹی آئی کو بتایا تھا کہ کھڑگے کو درد کی شکایت پر اسپتال لایا گیا تھا۔ ڈاکٹروں نے تفصیلی جانچ کے بعد انہیں علاج کے لیے داخل رکھا۔ کرناٹک کے وزیراعلیٰ سدارامیا نے بدھ کو اسپتال جا کر کھڑگے کی عیادت کی۔ بعد ازاں میڈیا سے گفتگو کرتے ہوئے انہوں نے کہا کہ کھڑگے کو معمولی بے چینی تھی لیکن اب وہ بہتر ہیں اور بات چیت بھی کر رہے ہیں۔ ڈاکٹروں نے اشارہ دیا تھا کہ انہیں جلد ڈسچارج کر دیا جائے گا۔