فیئر پلے آن لائن سٹہ بازی معاملہ میں ای ڈی کی کارروائی، 307 کروڑ کی جائیداد ضبط

ای ڈی نے یہ تحقیقات وایا کام 18 میڈیا پرائیویٹ لمیٹڈ کی شکایت پر شروع کی تھیں، جس میں فیئر پلے اور دیگر پر سنگین الزامات لگائے گئے تھے۔ کمپنی پر الزام ہے کہ اس کی سرگرمیوں کی وجہ سے 100 کروڑ روپے سے زائد کا نقصان ہوا۔ بعد ازاں اس معاملے میں درج کئی ایف آئی آرز کو ایک ساتھ ملا کر ای ڈی نے جانچ کو آگے بڑھایا۔

تحقیقات میں سامنے آیا ہے کہ فیئر پلے کے ذریعے مانی لانڈرنگ کے ذریعہ کئی سو کروڑ روپے کا لین دین کیا گیا اور یہ رقم تجارتی بنیادوں پر مانی لانڈرنگ کے ذریعے بیرون ملک بھیجی گئی۔ اس کارروائی کا اہم چہرہ کرش لکشمی چند شاہ ہے، جس نے دبئی، کوراکاؤ اور مالٹا میں متعدد کمپنیاں رجسٹرڈ کروائیں۔ ان کمپنیوں میں پلے وینچرز این وی، ڈچ اینٹیلس مینجمنٹ این وی (کوراکاؤ)، فیئر پلے اسپورٹس ایل ایل سی، فیئر پلے مینجمنٹ ڈی ایم سی سی (دبئی) اور پلے وینچرز ہولڈنگ لمیٹڈ (مالٹا) شامل ہیں۔