حال ہی میں امریکی صدر ڈونالڈ ٹرمپ نے کئی بڑی امریکی کمپنیوں کے سی ای او کے ساتھ وائٹ ہاؤس میں ڈنر کا انعقاد کیا۔ اس دوران ’ایپل‘ کے سی ای او ٹم کُک بھی موجود تھے۔ سوشل میڈیا پر ان سے اور ڈونالڈ ٹرمپ سے جڑی کچھ کلپس وائرل ہو رہی ہیں، جس کو لے کر یوزرس طرح طرح کے ردعمل کا اظہار کر رہے ہیں۔ لوگوں کا کہنا ہے کہ کُک نے ٹرمپ کے ساتھ 2 منٹ کی بات چیت میں 8 بار شکریہ کہا ہے۔
عشائیہ کے دوران ڈونالڈ ٹرمپ نے ٹم کُک کی ’ایپل‘ میں کام کرنے کی ستائش کرتے ہوئے کہا کہ انہوں نے چھوٹی کمپنی ایپل کے لیے بہترین اور غیر معمولی کام کیا ہے۔ اس پر کُک نے جواب دیا، ’شکریہ، مسٹر پریسیڈنٹ‘۔ ٹم کُک کے ساتھ اس عشائیہ میں گوگل کے سی ای او سندر پچائی اور فیس بُک کے سی ای او مارک زکربرگ بھی شامل تھے۔
ویڈیو میں دیکھا جا سکتا ہے کہ صرف دو منٹ سے بھی کم وقت میں کُک نے کم سے کم 8 مرتبہ شکریہ کہا۔ سوشل میڈیا یوزرس نے ’ایپل‘ کے سی ای او کی اس حرکت کو فوراً نوٹس کیا اور ویڈیو تیزی سے شیئر ہونے لگا۔
کُک نے عشائیہ میں مدعو کرنے کے لیے ٹرمپ کا شکریہ ادا کیا، صدر اور فرسٹ لیڈی کی ستائش کی اور کہا کہ ان کی حمایت کی وجہ سے ’ایپل‘ امریکہ میں بڑی سرمایہ کاری کر پا رہی ہے۔ انہوں نے فرسٹ لیڈی کی تعلیم پر توجہ دینے کی بھی تعریف کی، اسے عظیم مساوات لانے والا طریقہ بتایا۔
عشائیہ کے دوران ٹرمپ نے سیدھے طور پر کُک سے پوچھا کہ ’ایپل‘ کمپنی امریکہ میں کتنی سرمایہ کاری کرنے والی ہے۔ کُک نے جواب دیا ’600 بلین ڈالر‘ جس پر ٹرمپ نے شکریہ کہا اور کُک نے پھر سے شکریہ کیا۔ اس بات چیت کا ویڈیو انٹرنیٹ پر مزیدار انداز میں وائرل ہو رہا ہے۔ سوشل میڈیا یوزرس بھی اس پر الگ الگ انداز میں اپنا ردعمل ظاہر کر رہے ہیں۔
