ونتارا کا سپریم کورٹ کے حکم کا خیرمقدم، ایس آئی ٹی تحقیقات میں مکمل تعاون کا اعلان

جنگلی جانوروں کے تحفظ اور ان کے لیے بحالی مراکز کے قیام کے حوالے سے سرگرم ریلائنس فاؤنڈیشن کے جام نگر واقع بحالی مرکز ’ونتارا‘ نے سپریم کورٹ کے حالیہ حکم پر ردعمل ظاہر کرتے ہوئے کہا ہے کہ وہ عدالت کے فیصلے کا احترام کرتے ہوئے خصوصی تحقیقاتی ٹیم (ایس آئی ٹی) کے ساتھ مکمل تعاون کرے گا۔ اس مرکز پر الزام ہے کہ اس نے بھارت اور بیرونِ ملک سے جانوروں کے حصول اور بعض قوانین کی تعمیل نہ کرنے کے معاملے میں بے ضابطگیاں کی ہیں۔

خیال رہے کہ سپریم کورٹ کے جج جسٹس پنکج متل اور جسٹس پی بی ورالے پر مشتمل بنچ نے ونتارا کے خلاف مختلف شکایات اور میڈیا رپورٹس کی بنیاد پر جانچ کے لیے چار رکنی ایس آئی ٹی تشکیل دی ہے، جس کی سربراہی سپریم کورٹ کے سابق جج جسٹس جے چیلمیشور کریں گے۔