کانسٹی ٹیوشن کلب آف انڈیا کے سکریٹری کے عہدے کے انتخاب کے نتائج منگل کی رات دیر گئے سامنے آئے۔ بی جے پی کے سینئر رہنما راجیو پرتاپ روڈی نے ایک بار پھر انتخابات میں شاندار جیت حاصل کی ہے۔ انہوں نے اپنی پارٹی کے رہنما اور سابق رکن پارلیمنٹ اور سابق مرکزی وزیر سنجیو بالیان کو شکست دی۔ 700 سے زائد ارکان نے ووٹ دیا۔ مرکزی وزیر داخلہ امت شاہ، بی جے پی صدر جے پی نڈا، کانگریس لیڈر سونیا گاندھی، کانگریس صدر ملکارجن کھڑگے سمیت کئی بزرگ رہنماؤں نے ووٹنگ میں حصہ لیا۔
پچھلے 25 سالوں سے راجیو پرتاپ روڈی کا کانسٹی ٹیوشن کلب پر غلبہ ہے۔ وہ 25 سال تک کانسٹی ٹیوشن کلب کے سیکرٹری رہے اور دوبارہ الیکشن جیت کر انہوں نے واضح کر دیا ہے کہ وہ اس عہدے پر برقرار رہیں گے۔
اس بار الیکشن بہت دلچسپ رہا۔ سیکرٹری کے عہدے کے لیے ایک ہی پارٹی کے دو سینئر رہنماؤں میں مقابلہ تھا۔ لیکن، راجیو پرتاپ روڈی نے اپنی جیت کا ریکارڈ برقرار رکھا۔ انہوں نے پہلی بار 1999 میں سیکرٹری کے عہدے کے لیے الیکشن جیتا تھا۔
نیوز ایجنسی اے این آئی سے بات کرتے ہوئے راجیو پرتاپ روڈی نے کہا کہ’ یہ جیت میرے پینل کی جیت ہے۔ شاید میں ایک سو سے زیادہ ووٹوں سے جیتا ہوں۔ میرے پینل میں کانگریس، سماج وادی پارٹی، ترنمول کانگریس اور آزاد ارکان پارلیمنٹ تھے۔ مجھے گزشتہ دو دہائیوں کی محنت کا ثمر ملا ہے۔‘ الیکشن میں جیت کے بعد راجیو پرتاپ روڈی کی بیوی نیلم پرتاپ سنگھ نے کہا کہ جشن سب کے ساتھ منایا جائے گا۔ کچھ لمحات بہت پرجوش تھے، لیکن اب ہم قدرے آرام سے ہیں۔ ہم سب کے ساتھ مل کر جشن منائیں گے۔
کانسٹی ٹیوشن کلب کے سیکرٹری کے عہدے کا انتخاب 20 سال بعد ہوا۔ اس سے پہلے راجیو پرتاپ روڈی کئی بار بلا مقابلہ الیکشن جیت چکے ہیں۔ 680 درست ووٹ ڈالے گئے اور ووٹوں کی گنتی 26 راؤنڈ تک جاری رہی۔ ابتدائی ووٹوں کی گنتی کے دوران مقابلہ دلچسپ نظر آیا۔ تاہم 13ویں راؤنڈ کے بعد روڈی نے 28 ووٹوں کی برتری حاصل کر لی تھی۔ 22ویں راؤنڈ کے بعد یہ واضح ہو گیا کہ وہ جیت رہے ہیں۔ آخر میں، وہ 100 سے زائد ووٹوں سے دوبارہ جیت گئے۔
راجیو پرتاپ روڈی بھارتیہ جنتا پارٹی (بی جے پی) کے سینئر رہنما اور طویل عرصے سے رکن پارلیمنٹ ہیں۔ وہ فی الحال بہار کے سارن لوک سبھا حلقہ سے رکن پارلیمنٹ ہیں اور کئی بار لوک سبھا اور راجیہ سبھا کے رکن رہ چکے ہیں۔ 1996 میں، وہ پہلی بار چھپرا (اب سارن) لوک سبھا سیٹ سے ایم پی منتخب ہوئے۔ وہ بی جے پی کے قومی ترجمان، نیشنل ایگزیکٹو کے رکن اور کئی ریاستوں میں پارٹی کے انچارج بھی رہ چکے ہیں۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
