دہلی میں قتل کی ایک سنسنی خیز واردات پیش آئی ہے۔ یہاں نظام الدین علاقے میں مبینہ طور پر پارکنگ تنازعہ کو لے کر بالی ووڈ اداکارہ ہما قریشی کے چچا زاد بھائی آصف قریشی کا قتل کر دیے جانے کا معاملہ سامنے آیا ہے۔ پولیس کے مطابق یہ واقعہ جمعرات کی رات قریب 11 بجے نظام الدین کے جنگ پورہ بھوگل لین میں ہوا۔
’انڈیا ٹودے‘ کی رپورٹ کے مطابق پولیس نے بتایا کہ آصف قریشی کا دیر رات اسکوٹی کو گیٹ کے سامنے سے ہٹا کر سائڈ میں لگانے کو لے کر کچھ لوگوں سے تنازعہ ہوا تھا۔ جس کے بعد ملزمین نے آصف پر تیز دھار والے اسلحوں سے حملہ کر دیا۔ حملے کے بعد آصف کو سنگین حالت میں قریبی اسپتال لے جایا گیا جہاں ڈاکٹروں نے اسے مردہ قرار دے دیا۔ آصف کی اہلیہ اور رشتے داروں نے الزام لگایا ہے کہ ملزمین نے معمولی سی بات پر اس پر بے رحمی سے حملہ کیا۔
آصف کی اہلیہ شہناز قریشی نے پولیس کو بتایا کہ ملزمین نے پہلے بھی پارکنگ تنازعہ کو لے کر اس سے جھگڑا کیا تھا۔ انہوں نے بتایا کہ جمعرات کو جب آصف کام سے لوٹا، تو اس نے پڑوسی کی اسکوٹی گھر کے مین گیٹ کے سامنے کھڑی دیکھی، جس کے بعد اس نے اسے وہاں سے ہٹانے کے لیے کہا۔
انہوں نے الزام لگایا کہ پڑوسیوں نے اسکوٹی کو موقع سے ہٹانے کے بجائے آصف کو ہی گالی دینا شروع کر دیا اور پھر اس پر تیز اسلحوں سے حملہ کر دیا۔ پولیس نے معاملہ درج کرتے ہوئے واردات کے بعد سے فرار دونوں ملزمین کو گرفتار کرلیا ہے۔ معاملے کی آگے کی جانچ جاری ہے۔ اس سلسلے میں ہما قریشی کا ابھی تک کوئی ردعمل سامنے نہیں آیا ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
