’ملک بھر میں ووٹوں کی چوری، انتخابی نظام سوالوں کے گھیرے میں‘

کانگریس لیڈر اور لوک سبھا میں قائد حزب اختلاف راہل گاندھی کچھ ہی دیر میں نئی دہلی کے انڈیا بھون میں پریس کانفرنس سے خطاب کریں گے، جسے کانگریس پارٹی نے ’ووٹ چوری کا سب سے بڑا انکشاف‘ قرار دیا ہے۔ اس پریس کانفرنس سے قبل جاری کی گئیں تصاویر اور سوشل میڈیا پر تشہیر سے صاف ظاہر ہے کہ راہل گاندھی ایک سنجیدہ اور ممکنہ طور پر دھماکہ خیز انکشافات کے ساتھ سامنے آنے والے ہیں۔

ذرائع کے مطابق، راہل گاندھی کی توجہ کا مرکز بہار میں جاری انتخابی فہرستوں کی خصوصی نظرثانی پر ہے، جسے اپوزیشن جماعتوں نے ’منصوبہ بند ووٹ چوری‘ قرار دیا ہے۔ ان کا الزام ہے کہ اس عمل کے ذریعے لاکھوں ووٹروں کے نام فہرست سے ہٹائے جا رہے ہیں، خاص طور پر ان طبقات کے، جو حکومت کے خلاف ووٹ ڈال سکتے ہیں۔

یہ پہلا موقع نہیں ہے کہ راہل گاندھی اور اپوزیشن نے الیکشن کمیشن اور حکومت پر اس نوعیت کے الزامات عائد کیے ہوں۔ اس سے قبل مہاراشٹر میں ہونے والے اسمبلی انتخابات کے دوران بھی دھاندلی، فرضی ووٹ اور سرکاری مشینری کے غلط استعمال کے الزامات سامنے آئے تھے۔

پریس کانفرنس کے دوران راہل گاندھی کن شواہد، اعداد و شمار یا گواہیوں کا حوالہ دیتے ہیں، یہ دیکھنا باقی ہے۔ پارٹی کے تمام سوشل میڈیا پلیٹ فارمز پر اس کانفرنس کی لائیو اسٹریمنگ دستیاب ہے۔ لائیو بلاگ کے ذریعے لمحہ بہ لمحہ اپڈیٹس جاری رہیں گی۔