’سمجھا جانا ہی سب سے بڑا سکون ہے‘ نامور سنگھ کی ذاتی یادوں کا ایک سچا بیان

جب میرا اپینڈکس کا آپریشن ہوا، تو شیلا جی نے مجھے اپنے گھر لا کر تیمارداری کی۔ میں یہ احسان کبھی نہیں بھول سکتا۔ شاید موقع نہ ملا اس کا ذکر کرنے کا، مگر آج جب میں زندگی کے آخری موڑ پر ہوں، تو چاہتا ہوں کہ سب احسانوں کا شکریہ ادا کروں۔

ایک سنسکرت کا شلوک یاد آتا ہے، جس کا ترجمہ ہے: ’’نہ کچھ کیے ہوئے بھی، صرف سکھ پہنچا کر، کوئی شخص دکھ کو کم کر دے — وہی سب سے قیمتی ہوتا ہے۔‘‘

ایسے دوست زندگی کی سب سے بڑی نعمت ہوتے ہیں۔ ہمارے جتنے بھی دوست تھے، ان سے کبھی کبھی جھگڑے بھی ہوتے رہتے تھے، غلط فہمیاں بھی ہو جاتی تھیں۔ راجندر یادو کو تو میری بیٹی ’دشمن’ کے لقب سے جانتی تھی! لیکن یہ ویسا ہی دشمن تھا، جیسے اشک نے کہا تھا، ’منٹو میرا دشمن‘۔ البتہ راجندر، منٹو نہیں ہیں — اور ظاہر ہے اشک ہونا بھی میرے لیے کوئی قابلِ رشک بات نہیں۔ خیر، یہ سب چلتا رہتا ہے۔ اصل بات یہ ہے کہ میں خود کو خوش نصیب سمجھتا ہوں کہ جیسے اچھے بھائی مجھے ملے، ویسے ہی سچے دوست بھی۔