حزب اختلاف نے بہار ووٹر لسٹ نظرثانی پر اوم برلا کو لکھا خط، پارلیمنٹ میں فوری بحث کا مطالبہ

خط انڈیا اتحاد میں شامل مختلف اپوزیشن جماعتوں کے لیڈروں نے دستخط کر کے ارسال کیا ہے، جن میں سپریا سولے، ابھے کمار سنہا، گورو گگوئی اور این کے پریما چندرن شامل ہیں۔ اپوزیشن کا کہنا ہے کہ بہار میں جار ووٹر لسٹ کی خصوصی نظرثانی کا عمل معمول سے ہٹ کر نظر آتا ہے اور اس کے وقت، دائرہ کار اور شفافیت پر کئی سنگین سوالات اٹھ رہے ہیں، خاص طور پر اس لیے کہ ریاست میں آئندہ چند ماہ میں اسمبلی انتخابات متوقع ہیں۔

خط میں کہا گیا ہے کہ الیکشن کمیشن کی جانب سے عندیہ دیا گیا ہے کہ اسی طرز کی مہم جلد ہی پورے ملک میں شروع کی جائے گی۔ اس تناظر میں اپوزیشن پارٹیوں کا مؤقف ہے کہ ووٹر لسٹ کی نظرثانی کا معاملہ صرف ایک انتظامی قدم نہیں بلکہ یہ براہ راست حق رائے دہی، جمہوری شفافیت اور منصفانہ انتخابات سے جڑا ہوا معاملہ ہے، جس پر خاموشی ناقابل قبول ہے۔