سعودی عرب کی راجدھانی ریاض میں اترپردیش کے عاموں کا جلوہ نظر آیا ہے۔ یہاں اترپردیش کے ساتھ ساتھ جھارکھنڈ اور مغربی بنگال کی پریمیم آم کی قسمیں بھی تھیں۔ جنہوں نے اپنے ذائقے سے ہر کسی کو اپنا دیوانہ بنا لیا۔ ہندوستانی سفارت خانہ، ریاض، ایپیڈا اور لولو گروپ کی جانب سے منعقد کردہ اس ’آم تقریب‘ کی شروعات ڈپٹی ہیڈ آف مشن ابو ماتھین جارج نے کی تھی۔ یہ ’آم تقریب‘ المربہ میں بنے لولو ہائپر مارکیٹ میں کیا گیا تھا۔ اس میں آم کی قسموں کے ساتھ اس سے بنے کھانے بھی پیش کیے گئے۔
’آم تقریب‘ کے انعقاد نے معیاری آموں کے قابل اعتماد فراہم کنندہ کے طور پر ہندوستان کی پوزیشن کو مزید مضبوط بنا دیا ہے۔ ایسا پہلی بار ہے جب یوپی، جھارکھنڈ اور مغربی بنگال کے آم دبئی اور سعودی عرب میں دھوم مچا رہے ہیں۔ یہ سب مرکزی حکومت کے ایگریکلچر اینڈ پراسیسڈ فوڈ پروڈکٹس ایکسپورٹ ڈویلپمنٹ اتھارٹی (اے پی ای ڈی اے) کی پہل سے ممکن ہو پایا ہے۔ یوپی سے اس بار دبئی تقریباً 1200 کلوگرام دشہری آم بھیجے گئے تھے۔ باغبانی کے وزیر (آزادانہ چارج) دنیش پرتاپ سنگھ نے اسے ہری جھنڈی دکھائی تھی، یہ آم بذریعہ ہوائی جہاز دبئی گیا تھا۔ اس دوران یوپی کے دشہری آم کی تعریف کرتے ہوئے انہوں نے کہا تھا کہ ’’اتر پردیش پھلوں اور سبزیوں کی برآمد میں مسلسل کامیابی حاصل کر رہا ہے۔‘‘
اترپردیش کے علاوہ جھارکھنڈ کے جمشید پور سے اس بار امرپالی آم کو دبئی بھیجا گیا تھا، جمشید پور کے عبد الحمید خان نے کہا کہ ریاستی حکومت اور مرکزی حکومت کے تعاون سے اس بار سعودی عرب کے جدہ اور ریاض شہروں میں آم برآمد کیے گئے ہیں۔ مرکزی حکومت کے اے پی ای ڈی اے کے ساتھ ساتھ ریاستی حکومت کی مارکیٹ کمیٹی نے بھی اس میں تعاون کیا۔ حمید خان نے کہا کہ ایسا پہلی بار ہے جب آم کے برآمدات بیرون ممالک کے مختلف شہروں میں ہو رہے ہیں۔
