دہلی یونیورسٹی میں اسلام، پاکستان اور سیاسی تشدد سے متعلق نصاب ہٹانے کی سفارش، اساتذہ کا اعتراض

دہلی یونیورسٹی میں ایم اے سیاسیات کے نصاب سے اسلام، پاکستان، چین اور سیاسی تشدد جیسے اہم موضوعات کو ہٹانے کی سفارش کی گئی ہے، جس پر یونیورسٹی کے کئی اساتذہ نے سخت اعتراض ظاہر کیا ہے۔ اطلاعات کے مطابق یونیورسٹی کی تعلیمی امور کی مستقل کمیٹی نے حالیہ اجلاس میں متعدد مضامین پر نظرثانی کی اور کچھ کو مکمل طور پر ہٹانے یا ان کی جگہ نئے مضامین شامل کرنے کی سفارش کی ہے۔

مستقل کمیٹی کی رکن ڈاکٹر مونامی سنہا نے بتایا کہ ایم اے سیاسیات کے نصاب کی نظر ثانی کی گئی ہے۔ ان کے مطابق ’پاکستان اینڈ دی ورلڈ‘، ’موجودہ دنیا میں چین کا کردار‘، ’اسلام اور عالمی تعلقات‘، ’پاکستان: ریاست و سماج‘ اور ’مذہبی قوم پرستی اور سیاسی تشدد‘ جیسے مضامین کو یا تو مکمل طور پر ختم کیا جا رہا ہے یا نئے مواد سے تبدیل کیا جائے گا۔