رام مندر میں عطیات کی رقم کی چوری کی اعلیٰ عدالتی نگرانی میں جانچ ہو: کانگریس

نئی دہلی: کانگریس نے رام مندر میں عطیات کی رقم کی مبینہ چوری کے معاملے کو کروڑوں عقیدت مندوں کے اعتماد پر ضرب قرار دیتے ہوئے مطالبہ کیا ہے کہ اس کی جانچ الٰہ آباد ہائی کورٹ کے حاضر سروس جج کی نگرانی میں مقررہ مدت کے اندر مکمل کی جائے اور قصورواروں کو قانون کے مطابق سخت سزا دی جائے۔

نئی دہلی میں پارٹی دفتر میں منعقدہ پریس کانفرنس سے خطاب کرتے ہوئے اتر پردیش کانگریس کے صدر اجے رائے اور ریاستی کانگریس کی قانون ساز پارٹی کی رہنما آرادھنا مشرا نے بھارتیہ جنتا پارٹی اور راشٹریہ سویم سیوک سنگھ پر شدید تنقید کی۔ ان کا کہنا تھا کہ رام مندر سے وابستہ معاملات میں سنگین بے ضابطگیوں کے الزامات سامنے آنے کے بعد ملک کے کروڑوں رام بھکتوں کے جذبات مجروح ہوئے ہیں۔