امریکہ کا ایران پر حملہ، پورے مشرق وسطیٰ میں ہائی ایلرٹ

امریکا نے ایران پر دوبارہ حملے کیے ہیں۔امریکی  صدر ڈونالڈ ٹرمپ اور وزیر دفاع پیٹ ہیگستھ کی وارننگ کے بعد امریکی فوج نے کئی اہم ایرانی اہداف کو نشانہ بنایا ہے۔ ایرانی خبر رساں اداروں نے بھی امریکی حملوں کی تصدیق کی ہے۔ ایجنسی نے بتایا کہ ایران کے جزیرہ کش اور بندر عباس میں دھماکوں کی آوازیں سنی گئیں۔

امریکی سینٹرل کمانڈنے سوشل میڈیا پلیٹ فارم ایکس پر ایران پر حملے کی تصدیق کی۔ امریکی سینٹرل کمانڈنے بتایا کہ امریکی فوج نے کمانڈر انچیف کے حکم پر مشرقی معیاری وقت (EST) شام 5:15 پر ایران کے اندر کئی اہداف پر حملے شروع کیے۔ انتظامیہ کے مطابق یہ سخت کارروائی ایران کی مسلسل جارحیت کا براہ راست جواب ہے۔

امریکی فضائی حملے کے فوراً بعد ایران کے سیریک اور مناب علاقوں سے بڑے دھماکوں کی اطلاعات سامنے آئیں۔ مقامی ایرانی میڈیا اور مہر نیوز ایجنسی کے مطابق جوابی کارروائی کی تیاری کے لیے ملک کے کئی حصوں میں اینٹی ایئر کرافٹ اور فضائی دفاعی نظام کو فوری طور پر فعال کر دیا گیا۔ اس دوران جزیرہ کش پر کئی نامعلوم دھماکوں کی آوازیں دور دور تک سنی گئیں۔

ایجنسی کا کہنا ہے کہ کش جزیرے پر نامعلوم آوازیں سنی گئیں۔ جس کے بعد صوبہ فارس میں فضائی دفاعی نظام کو فوری طور پر فعال کر دیا گیا۔ تسنیم خبررساں ادارے نے ایک اعلیٰ فوجی ذریعے کے حوالے سے بتایا ہے کہ ایرانی مسلح افواج آج رات کسی بھی حملے کا مقابلہ کرنے کے لیے پوری طرح تیار ہے۔

ایرانی عسکری ذرائع نے امریکہ کو سختی سے خبردار کیا کہ کسی بھی اشتعال انگیز اقدام کے سنگین نتائج برآمد ہوں گے۔ ایران نے واضح کیا ہے کہ امریکی کارروائی کی صورت میں کئی نئے امریکی مفادات اور اڈوں کو براہ راست اس کے فوجی ریڈار سے نشانہ بنایا جائے گا۔

اس فوجی کشیدگی کے درمیان اقوام متحدہ میں ایران کے سفیر نے بھی ملک کی پوزیشن واضح کر دی ہے۔ ان کا کہنا تھا کہ دھمکیوں یا طاقت کے استعمال سے امریکہ کے ساتھ کوئی دیرپا معاہدہ نہیں ہو سکتا۔ انہوں نے اس بات کا اعادہ کیا کہ ایران نے کبھی دھمکی کے تحت مذاکرات نہیں کیے اور نہ ہی وہ کبھی دباؤ کے سامنے ہتھیار ڈالے گا۔

اس سے قبل امریکی صدر ڈونالڈ ٹرمپ نے ایران کو تنبیہ کرتے ہوئے کہا تھا کہ ایران نے امن معاہدے پر بات چیت میں بہت زیادہ وقت لیا ہے اور اب اسے اس کی قیمت چکانی پڑے گی۔ انہوں نے بدھ کے روز کہا کہ آبنائے ہرمز میں امریکی بحری ناکہ بندی ایک فولادی دیوار کی مانند ہے، ہماری رضامندی کے بغیر کوئی بھی اسے عبور نہیں کر سکتا۔