آئی پی ایل 2026 کے فائنل میں شکست کے بعد گجرات ٹیم کے ساتھ پیش آیا حادثہ، بس میں دھواں پھیلنے سے افرا تفری

’آئی پی ایل 2026‘ کے فائنل میں اتوار کو شکست کے بعد گجرات ٹائٹنز کے کھلاڑیوں اور سپورٹ اسٹاف کے ساتھ ایک بڑا حادثہ پیش آیا، حالانکہ سبھی بال بال بچ گئے۔ ٹیم کو ہوٹل واپس لے جانے والی بس میں شارٹ سرکٹ ہونے کے باعث گاڑی راستے میں ہی خراب ہو گئی، جس کے بعد کھلاڑیوں اور اسٹاف کو فوری طور پر بس سے باہر نکالنا پڑا۔

خبر رساں ایجنسی پی ٹی آئی کی ایک رپورٹ کے مطابق بس میں تکنیکی خرابی پیدا ہونے کے بعد اس کے اندر دھواں بھرنے لگا۔ اس سے افرا تفری پھیل گئی اور سبھی کھلاڑی فکر میں مبتلا ہو گئے۔ صورت حال کو دیکھتے ہوئے ٹیم انتظامیہ اور سیکورٹی اہلکاروں نے کھلاڑیوں اور سپورٹ اسٹاف کو محفوظ طریقے سے بس سے باہر نکالا۔ اطمینان کی بات یہ رہی کہ اس واقعہ میں کوئی بھی کھلاڑی یا اسٹاف رکن زخمی نہیں ہوا۔

واقعہ کے بعد پوری ٹیم کچھ وقت تک سڑک کے کنارے کھڑی نظر آئی۔ بعد ازاں دوسری بس کا انتظام کیا گیا، جس کے ذریعہ کھلاڑیوں اور سپورٹ اسٹاف کو ہوٹل پہنچایا گیا۔ یہ واقعہ گجرات ٹائٹنز کے لیے پہلے ہی ایک مایوس کن دن کے اختتام پر پیش آیا۔ اتوار کو کھیلے گئے آئی پی ایل 2026 کے فائنل میں ٹیم کو رائل چیلنجرز بنگلورو (آر سی بی) کے خلاف 5 وکٹوں سے شکست کا سامنا کرنا پڑا تھا۔ اس ہار کے ساتھ ہی گجرات کا خطاب جیتنے کا خواب بھی چکنا چور ہو گیا۔

فائنل سے قبل بھی گجرات ٹائٹنز کا سفری پروگرام کافی مصروف اور چیلنجنگ رہا۔ ٹیم نے 27 مئی کو دھرمشالا سے ملاں پور کا سفر کیا تھا، جہاں 29 مئی کو راجستھان رائلز کے خلاف کوالیفائر-2 کھیلا گیا۔ اس کے بعد 30 مئی کو احمد آباد واپسی کا پروگرام تھا، لیکن ملاں پور میں خراب موسم کے باعث ٹیم کی پرواز کافی دیر تک متاثر رہی۔ مسلسل تاخیر کے بعد گجرات ٹائٹنز کا دستہ ہفتہ کی دیر شام اپنے ہوم گراؤنڈ احمد آباد پہنچ سکا تھا۔ ایسے میں فائنل میں شکست اور پھر ٹیم بس میں پیش آنے والی تکنیکی خرابی نے گجرات ٹائٹنز کے لیے مشکلات سے بھرپور ایک طویل اور تھکا دینے والی مہم کا مایوس کن اختتام کر دیا۔