نیٹ-یو جی تنازعہ پر راہل گاندھی کا حملہ، کہا- ’22 لاکھ طلبہ کا مستقبل داؤ پر، وزیر اعظم خاموش‘

نئی دہلی: لوک سبھا میں قائد حزب اختلاف اور کانگریس کے سینئر لیڈر راہل گاندھی نے نیٹ۔یو جی 2026 امتحان تنازعہ کو لے کر مرکزی حکومت پر سخت حملہ کرتے ہوئے مرکزی وزیر تعلیم دھرمیندر پردھان کے استعفے کا مطالبہ ایک بار پھر دہرایا ہے۔ انہوں نے کہا ہے کہ جب تک پرچہ لیک کے واقعات کو روکنے کے لیے مکمل طور پر محفوظ نظام تیار نہیں کیا جاتا، کانگریس اپنی تحریک جاری رکھے گی۔

راہل گاندھی نے سوشل میڈیا پلیٹ فارم ایکس پر ایک پوسٹ کے ذریعے اپنی بات رکھی۔ انہوں نے کانگریس کی طلبہ تنظیم نیشنل اسٹوڈنٹس یونین آف انڈیا یعنی این ایس یو آئی کے احتجاج کی ویڈیو کو دوبارہ شیئر کرتے ہوئے کہا کہ لاکھوں نوجوان سڑکوں پر ہیں اور 22 لاکھ طلبہ کا مستقبل داؤ پر لگا ہوا ہے لیکن وزیر اعظم اس معاملے پر خاموش ہیں۔ انہوں نے کہا کہ حکومت جواب دینے کے بجائے ذمہ داری سے بچنے کی کوشش کر رہی ہے۔