اتر پردیش میں 111 اموات سے دلبرداشتہ روسی صدر پوتن نے پی ایم مودی کو لکھا خط، یو اے ای کا بھی اظہار افسوس

اتر پردیش میں گزشتہ دنوں آئے شدید آندھی، طوفان اور موسلادھار بارش کے سبب ہوئے شدید جانی نقصان پر دنیا کے کئی ممالک نے افسوس کا اظہار کیا ہے۔ روسی صدر ولادمیر پوتن اور متحدہ عرب امارات (یو اے ای) نے اس قدرتی آفت کے بعد ہندوستان کے تئیں تعزیت کا اظہار کیا ہے۔ دراصل بدھ کو اتر پردیش کے کئی اضلاع میں شدید آندھی اور موسلا دھار بارش ہوئی تھی۔ اس دوران کئی مقامات پر درخت اکھڑ گئے، بجلی کے کھمبے گر گئے اور گھروں کو بھی نقصان پہنچا۔ اس قدرتی آفت میں کم از کم 111 لوگوں کی موت ہو گئی، جبکہ 72 افراد زخمی ہوئے۔

روسی صدر پوتن نے 14 مئی کو ہندوستانی صدر دروپدی مرمو اور وزیر اعظم نریندر مودی کو خط لکھ کر اتر پردیش میں ہوئی اموات پر گہرے رنج و غم کا اظہار کیا ہے۔ انہوں نے کہا ہے کہ اس قدرتی آفت میں جان گنوانے والے لوگوں کے اہل خانہ کے تئیں ان کی گہری ہمدردیاں ہیں۔ پوتن نے اپنے پیغام میں کہا کہ ’’اتر پردیش میں آئے طوفان اور شدید تباہی کی خبر سے مجھے دکھ پہنچا ہے۔ مہلوکین کے اہل خانہ اور متاثرہ افراد کے تئیں میں تعزیت کا اظہار کرتا ہوں اور زخمیوں کی جلد صحت یابی کے لیے دعا گو ہوں۔‘‘

یو اے ای نے بھی اس حادثے پر ہندوستان کے ساتھ یکجہتی کا اظہار کیا ہے۔ ابو ظبی سے جاری بیان میں یو اے ای کی وزارت خارجہ نے کہا کہ وہ اس غم کے وقت میں حکومت ہند اور ہندوستانی عوام کے ساتھ کھڑی ہے۔ یو اے ای نے حادثے میں جان گنوانے والے لوگوں کے اہل خانہ کے تئیں گہری تعزیت ظاہر کی اور زخمیوں کی جلد صحت یابی کی خواہش بھی کی۔

بہرحال، اتر پردیش کے وزیر اعلیٰ یوگی آدتیہ ناتھ نے بدھ کو بے موسم بارش، آندھی اور آسمانی بجلی گرنے سے ہوئے جان و مال کے نقصان کا نوٹس لیا۔ انہوں نے افسران کو 24 گھنٹوں کے اندر متاثرہ خاندانوں تک راحت پہنچانے کی ہدایت دی۔ راحت کمشنر دفتر نے 14 مئی کی شام جاری ایک بیان بھی جاری کیا تھا، جس میں بتایا کہ ’’13 مئی کو خراب موسم، طوفان، بارش، ژالہ باری اور آسمانی بجلی گرنے کے سبب 26 اضلاع سے 111 افراد کی موت کی خبریں موصول ہوئی ہیں۔ ریاست میں 72 افراد زخمی ہوئے، 170 مویشی ہلاک ہوئے اور 227 گھروں کو نقصان پہنچا۔‘‘