ریونت ریڈی نے بدلی وی آئی پی کلچر کی روایت، قافلے کے باوجود عام ٹریفک رواں

تلنگانہ کے وزیر اعلیٰ ریونت ریڈی نے وی آئی پی کلچر کے خلاف بڑا قدم اٹھاتے ہوئے اپنے قافلے کی آمد و رفت کے دوران عام لوگوں کو سڑکوں پر روکنے کی روایت ختم کرنے کی ہدایت دی ہے۔ اسی فیصلے کے تحت جمعرات کو حیدرآباد میں وزیر اعلیٰ کا قافلہ عام ٹریفک کے درمیان گزرا اور شہریوں کی آمد و رفت کو مکمل طور پر بند نہیں کیا گیا۔

ریونت ریڈی نئی دہلی کے دورے سے واپسی کے بعد شمس آباد واقع راجیو گاندھی بین الاقوامی ہوائی اڈے سے جوبلی ہلز میں واقع اپنی رہائش گاہ پہنچے۔ اس دوران ٹریفک پولیس نے معمول کے مطابق گاڑیوں کی آمد و رفت جاری رکھی۔ اگرچہ حفاظتی انتظامات موجود تھے، لیکن سڑکوں کو مکمل طور پر خالی نہیں کرایا گیا اور ایک لین سے ٹریفک چلتی رہی۔

وزیر اعلیٰ نے ایک روز قبل سینئر پولیس افسران کو واضح ہدایات دی تھیں کہ وی آئی پی موومنٹ کے نام پر عوام کو غیر ضروری پریشانی کا سامنا نہ کرنا پڑے۔ انہوں نے کہا تھا کہ ان کے قافلے کی وجہ سے لوگوں کو سڑکوں پر طویل وقت تک انتظار کرنے پر مجبور نہیں کیا جانا چاہیے۔ ریونت ریڈی نے اس بات پر زور دیا کہ عوامی سہولت کو ترجیح دی جائے اور ٹریفک نظام کو اس انداز میں چلایا جائے کہ شہریوں کی روزمرہ زندگی متاثر نہ ہو۔

تلنگانہ کے ڈائریکٹر جنرل آف پولیس سی وی آنند کے مطابق وزیر اعلیٰ نے ہدایت دی ہے کہ ریاست بھر میں وزیر اعلیٰ اور دیگر وی آئی پی شخصیات کے قافلوں کے دوران عوام کو کم سے کم دشواری ہو۔ انہوں نے بتایا کہ بدھ کے روز وزیر اعلیٰ جب نئی دہلی روانہ ہو رہے تھے تو ہوائی اڈے کے قریب شدید ٹریفک جام دیکھ کر ناراض ہوئے تھے۔ اس کے بعد انہوں نے متعلقہ افسران سے جواب طلب کیا اور ٹریفک انتظامات میں فوری بہتری کی ہدایت دی۔

ڈی جی پی دفتر کے مطابق وزیر اعلیٰ نے یہ بھی کہا کہ مخالف سمت سے آنے والی گاڑیوں کو بلاوجہ نہ روکا جائے اور ایسے افسران کے خلاف سخت کارروائی کی جائے جو اپنی ڈیوٹی میں لاپروائی برتتے ہیں۔ وزیر اعلیٰ کی ہدایت کے بعد سی وی آنند نے ریاست کے تمام کمشنریٹس کے لاء اینڈ آرڈر اور ٹریفک پولیس افسران کے ساتھ ویڈیو کانفرنس کر کے نئی ہدایات جاری کیں تاکہ وی آئی پی سکیورٹی اور عوامی سہولت کے درمیان بہتر توازن قائم کیا جا سکے۔