دہلی، یوپی و بہار میں جھلسا دینے والی گرمی اور اتراکھنڈ میں بارش و برف باری کے آثار

دہلی-این سی آر میں گرمی کی شدت لگاتار بڑھ رہی ہے۔ سورج کی تپش سے لوگ بے حال ہو رہے ہیں۔ زیادہ سے زیادہ درجہ حرارت 42 ڈگری سلسیس تک پہنچ گیا ہے۔ آئی ایم ڈی نے اگلے 2 دنوں تک ہیٹ ویو یعنی گرم لہر کا الرٹ جاری کیا ہے۔ آج موسم صاف رہے گا اور دن میں تیز دھوپ کا امکان ہے۔ بارش کا کوئی اندیشہ ظاہر نہیں کیا گیا ہے۔ آئی ایم ڈی نے 24 اور 25 اپریل کو ہیٹ ویو کا یلو الرٹ جاری کیا ہے۔

محکمہ موسمیات کے مطابق آج دہلی کا زیادہ سے زیادہ درجہ حرارت 42 ڈگری سلسیس اور کم سے کم درجہ حرارت 24 ڈگری سلسیس رہنے کی امید ہے۔ 26، 27 اور 28 اپریل کو ہلکے بادل چھائے رہ سکتے ہیں اور ہلکی بارش کا امکان ظاہر کیا گیا ہے۔ اتر پردیش میں بھی شدید گرمی پڑ رہی ہے۔ کئی اضلاع میں درجہ حرارت 45 ڈگری سلسیس تک پہنچ گیا ہے۔ 24 سے 26 اپریل تک ریاست کے بیشتر اضلاع میں ہیٹ ویو کا الرٹ جاری کیا گیا ہے۔ 27 اپریل کو ہلکی بوندا باندی کا امکان ظاہر کیا گیا ہے۔

بہار میں بھی حالات دہلی اور اتر پردیش کی طرح شدید گرمی والے ہیں۔ بدھ کے روز پٹنہ سمیت کئی اضلاع میں درجہ حرارت 40 ڈگری سلسیس سے اوپر رہا۔ آئی ایم ڈی کے مطابق 24 اپریل کو کئی اضلاع میں آندھی اور بارش کا امکان ہے، یعنی کل موسم کا مزاج بدل سکتا ہے۔ دوسری طرف مدھیہ پردیش میں جھلسا دینے والی گرمی سے فی الحال راحت ملتی ہوئی دکھائی نہیں دے رہی ہے۔ بدھ کو کھجوراہو کا درجہ حرارت 43 ڈگری درج کیا گیا۔ محکمہ موسمیات نے بھوپال سمیت 10 اضلاع میں لو چلنے کا الرٹ جاری کیا ہے۔ آج اور کل کچھ ضلعوں میں بوندا باندی کے آثار ضرور ہیں، لیکن گرمی سے راحت ملنے کی امید نہیں ہے۔ راجستھان کے کئی ضلعوں میں 23 سے 25 اپریل تک ہیٹ ویو سے متعلق یلو الرٹ جاری کیا گیا ہے۔ آئی ایم ڈی نے آنے والے دنوں میں درجہ حرارت مزید بڑھنے کا اندیشہ ظاہر کیا ہے۔ یہاں 25 اپریل تک بارش کے کوئی آثار نہیں ہیں۔

ہندوستان کی کچھ ریاستوں میں اس وقت موسم انتہائی خوشگوار ہے۔ فعال مغربی طوفان کے سبب اتراکھنڈ میں موسم یو-ٹرن لینے والا ہے۔ آئی ایم ڈی کے مطابق 24 اپریل کو اترکاشی، چمولی سمیت کئی اضلاع میں بارش اور برف باری ہونے کا امکان ہے۔ 26 اپریل کو بھی بارش کے آثار ہیں۔ جموں و کشمیر، لداخ اور ہماچل پردیش میں 24 سے 28 اپریل کے درمیان ہلکی بارش اور برف باری کے آثار ہیں۔