پاکستان میں تپ دق کا سنگین بحران، روزانہ 140 اموات، عالمی ادارہ صحت کی وارننگ

عالمی ادارہ صحت کی جانب سے عالمی یومِ تپِ دق کے موقع پر جاری اعداد و شمار کے مطابق پاکستان میں ہر سال تقریباً 6 لاکھ 69 ہزار افراد تپِ دق سے متاثر ہوتے ہیں، جبکہ 51 ہزار کے قریب اموات ہوتی ہیں۔ یہ اعداد و شمار نہ صرف تشویشناک ہیں بلکہ اس امر کی نشاندہی بھی کرتے ہیں کہ ملک میں اس بیماری پر قابو پانے کی کوششیں ناکافی ثابت ہو رہی ہیں۔

ایک مقامی اخبار میں شائع اداریے کے مطابق پاکستان مشرقی بحیرہ روم کے خطے میں تپِ دق کے کل کیسز کا تقریباً 73 فیصد بوجھ اٹھا رہا ہے اور دنیا بھر میں اس بیماری کے حوالے سے پانچویں نمبر پر ہے۔ یہ صورت حال اس بات کی غماز ہے کہ عوامی صحت کے شعبے میں درپیش مسائل اب تک مؤثر انداز میں حل نہیں ہو سکے۔