ٹرمپ کی ایران کو سخت وارننگ، تہران کا امریکہ اور اسرائیل پر جوابی دباؤ

واشنگٹن/تہران: آبنائے ہرمز کے گرد بڑھتی ہوئی کشیدگی نے ایک بار پھر عالمی سطح پر تشویش پیدا کر دی ہے، جہاں امریکی صدر ڈونالڈ ٹرمپ نے ایران کو تیل بردار جہازوں سے مبینہ طور پر فیس وصول کرنے اور ان کی آمد و رفت محدود کرنے پر سخت وارننگ دی ہے، وہیں ایران نے بھی امریکہ پر دباؤ ڈالتے ہوئے اسرائیل کو سفارتی عمل متاثر کرنے سے روکنے کا مطالبہ کیا ہے۔

صدر ڈونالڈ ٹرمپ نے اپنے سوشل میڈیا بیان میں ایران پر الزام عائد کیا کہ وہ آبنائے ہرمز سے گزرنے والے تیل بردار جہازوں کو اجازت دینے میں غیر ذمہ دارانہ رویہ اپنا رہا ہے۔ انہوں نے کہا کہ اگر ایران واقعی ٹینکروں سے فیس وصول کر رہا ہے تو اسے فوری طور پر یہ عمل بند کرنا ہوگا کیونکہ یہ کسی بھی سمجھوتے کا حصہ نہیں تھا۔ ٹرمپ کے مطابق اس طرح کے اقدامات نہ صرف جنگ بندی کی روح کے خلاف ہیں بلکہ عالمی توانائی سپلائی کو بھی خطرے میں ڈال سکتے ہیں۔