سی بی ایس ای کے نئے نصاب پر تنازعہ، وزیراعلیٰ اسٹالن نے کہا ’غیر ہندی ریاستوں پر زبان مسلط کرنے کی ہورہی کوشش‘

تمل ناڈو کے وزیر اعلی ایم کے اسٹالن نے سی بی ایس ای کے نئے نصاب پر سخت تنقید کی۔ انہوں نے اسے زبان تھوپنے کی دانستہ کوشش قرار دیتے ہوئے الزام لگایا کہ یہ پالیسی ہندی کو فروغ دیتی ہے اور علاقائی زبانوں کو کمزور کرتی ہے۔ اسٹالن نے کہا کہ یہ فریم ورک وفاقی ڈھانچے کو نقصان پہنچاتا ہے، غیر ہندی ریاستوں کے ساتھ تفریق کرتا ہے اور طلباء اور اساتذہ پر اضافی بوجھ ڈالتا ہے۔ انہوں نے مرکزی حکومت سے اپیل کی کہ وہ ہندوستان کے لسانی تنوع کا احترام کرے اور ریاستوں کے حقوق کا تحفظ کرے۔

بتادیں کہ سی بی ایس ای۔ 27-2026 تعلیمی سال سے مرحلہ وار طریقے سے سہ لسانی پالیسی نافذ کرنے جارہا ہے جس کی شروعات کلاس 6 سے ہوگی۔ اس پالیسی کے تحت طلباء کو ایک اضافی زبان سیکھنا ہوگا اور 3 میں سے کم از کم دو ہندوستانی زبانیں لازمی ہوں گی۔ سوشل میڈیا پلیٹ فارم’ایکس‘ پر ایک تفصیلی پوسٹ میں اسٹالن نے کہا کہ یہ کوئی عام تعلیمی اصلاح نہیں ہے بلکہ ایک تشویشناک اور جان بوجھ کر کی گئی کوشش ہے جو ہمارے دیرینہ اندیشوں کو درست کرتا ہے۔ ہندوستانی زبانوں کو فروغ دینے کی آڑ میں این ڈی اے حکومت ایک مرکزی ایجنڈہ چلارہی ہے جس کے تحت ہندی کو فروغ دیا جائے گا اور ملک کے خوشحالی لسانی ورثے کو منظم طریقے سے حاشئے پر پہنچادیا جائے گا۔

تمل ناڈو کے وزیراعلیٰ نے سہ لسانی فارمولے کو ہندی کو غیر ہندی لسانی ریاستوں میں پھیلانے کے لیے ایک خفیہ طریقہ کار کے طور پر بیان کیا اور کہا کہ یہ پالیسی ڈھانچہ جاتی طور سے ہندی بولنے والے طلباء کو فائدہ پہنچاتی ہے جس سے غیرجانداری، انصاف پسندی، وفاقیت اور علاقائی مساوات متاثر ہوتے ہیں۔ اسٹالن نے سوال کیا کہ جہاں پالیسی عملی طور پر جنوبی ریاستوں کے طلبہ کے لیے ہندی کو لازمی بناتی ہے، کیا ہندی بولنے والی ریاستوں میں تمل، تیلگو، کنڑ، ملیالم یا یہاں تک کہ بنگالی اور مراٹھی زبانیں سیکھنا لازمی قرار دیا جائے گا؟ انہوں نے کہا کہ اس طرح کے باہمی تعاون کا فقدان اس پالیسی کی یک طرفہ اور امتیازی نوعیت کو بے نقاب کرتا ہے۔

مرکزی حکومت پر دوہرا معیار اپنانے کا الزام لگاتے ہوئے وزیر اعلیٰ نے کہا کہ وہی مرکزی حکومت، جو کیندریہ ودیالیہ سنگٹھن کے اسکولوں میں تمل کو لازمی نہیں بناپائی اور ضروری تمل اساتذہ کی بھرتی بھی نہیں کرسکی، اب ریاستوں کو ہندوستانی زبانوں کی تشہیر کا سبق پڑھارہی ہے۔ یہ عزم نہیں بلکہ صریحاً منافقت ہے۔

انہوں نے الزام لگایا کہ مرکزی حکومت تمل ناڈو اور دیگر ریاستوں کی طرف سے اٹھائے گئے جمہوری خدشات کو نظر انداز کرتے ہوئے ہندی کو مسلط کرنے کی پابند دکھائی دیتی ہے۔ اسٹالن نے اسے تعاون پر مبنی وفاقیت کے اصولوں پر براہ راست حملہ اور کروڑوں ہندوستانیوں کی لسانی شناخت کی توہین قرار دیا۔ انہوں نے تمل ناڈو میں اے آئی اے ڈی ایم کے اور اس کے این ڈی اے اتحادیوں سے بھی سوال کیا کہ آیا وہ اس مسلط کئے جانے کی حمایت کرتے ہیں یا طلباء کے حقوق، شناخت اور مستقبل کے تحفظ کے لیے کھڑے ہوں گے۔