بنگلہ دیش کے لیے 2026 کی ابتدا تنازعات سے بھرپور رہی ہے۔ پہلے تو تنازعہ کے سبب ٹی20 عالمی کپ سے باہر ہونا اور اب بنگلہ دیش کرکٹ بورڈ کے انتخابات کو لے کر نیا ہنگامہ برپا ہونا۔ اس وقت بنگلہ دیش حکومت اور بنگلہ دیش کرکٹ بورڈ (بی سی بی) آمنے سامنے ہیں اور اس تنازعہ کا مرکز بی سی بی کے صدر امین الاسلام ہیں۔
درحقیقت گزشتہ سال اکتوبر میں امین الاسلام دوبارہ بی سی بی کے صدر منتخب ہوئے تھے۔ سابق کرکٹر تمیم اقبال نے ان کے انتخاب پر سوال اٹھائے تھے اور الزام عائد کیا تھا کہ انتخاب میں گڑبڑی ہوئی ہے۔ معاملہ سامنے آنے کے بعد بنگلہ دیش حکومت نے اس کی جانچ شروع کر دی تھی، لیکن بی سی بی نے اشاروں ہی اشاروں میں حکومت کو خبردار کیا تھا کہ اگر زیادہ مداخلت کی گئی تو آئی سی سی (انٹرنیشنل کرکٹ کونسل) کارروائی کر سکتا ہے۔
اسی دوران ایشیائی کرکٹ کونسل کے سابق سی ای او سید اشرف الحق کے ایک بیان نے ایک نئی بحث شروع کر دی ہے۔ ان کا کہنا ہے کہ آئی سی سی کا نام لے کر بی سی بی بچنے کی کوشش کر رہا ہے۔ حقیقت یہ ہے کہ بی سی بی نیشنل اسپورٹس کونسل کے تحت آتا ہے۔ اشرف الحق نے کہا ہے کہ اگر انتخاب یا کام کرنے کے طریقۂ کار میں کوئی بے ضابطگی پائی گئی تو این ایس سی کے پاس مکمل اختیار ہے کہ وہ بورڈ کو تحلیل کر سکتا ہے۔
اشرف الحق نے اس معاملہ میں وضاحت پیش کرتے ہوئے کہا کہ آئی سی سی کسی ملک کے داخلی معاملات میں مداخلت نہیں کرتا، زیادہ سے زیادہ ہدایات جاری کر سکتا ہے۔ انہوں نے پاکستان کی مثال دیتے ہوئے کہا کہ وہاں کئی بار صدور تبدیل کیے گئے، لیکن آئی سی سی نے مداخلت نہیں کی۔ اس لیے اگر بنگلہ دیش کرکٹ بورڈ کا کام درست ہے تو اس معاملے میں بھی آئی سی سی مداخلت نہیں کرے گا۔
اس تعلق سے بنگلہ دیش کے وزیر برائے کھیل امین الحق کا کہنا ہے کہ جانچ رپورٹ دیکھنے اور آئی سی سی سے بات چیت کے بعد ہی کسی نتیجے پر پہنچا جائے گا۔ اگر بی سی بی کو قصوروار پایا گیا تو حکومت سخت کارروائی کر سکتی ہے، تاہم ابھی تک تحقیقاتی رپورٹ سامنے نہیں آئی ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
