حقیقی ترقی تب آئے گی جب مساوات صرف ایک خواہش نہیں بلکہ ہر عورت کی عملی حقیقت بن جائے گی: ملکارجن کھڑگے

عالمی یوم خواتین کے موقع پر کانگریس کے قومی صدر ملکارجن کھڑگے، کانگریس رکن پارلیمنٹ پرینکا گاندھی اور لوک سبھا میں حزب اختلاف کے قائد راہل گاندھی نے مبارکباد پیش کی۔ ملکارجن کھڑگے نے سوشل میڈیا پلیٹ فارم ’ایکس‘ پر صنفی مساوات کے حوالے سے بابا صاحب ڈاکٹر بھیم راؤ امبیڈکر کا ایک قول نقل کیا کہ ’’آپ تکلیف برداشت کرنے کے لیے پیدا نہیں ہوئیں، آپ بلند ہونے کے لیے پیدا ہوئی ہیں۔‘‘ ساتھ ہی انہوں نے لکھا کہ ’’خواتین محض ترقی میں شریک نہیں ہوتیں، بلکہ وہ اس کی اصل محرک قوت ہیں۔ اپنی دانشمندی، ثابت قدمی، ہمدردی اور عزم کے ذریعے خواتین معاشروں کو مضبوط بناتی ہیں اور مضبوط قومیں تعمیر کرتی ہیں۔‘‘

کانگریس کے قومی صدر ملکارجن کھڑگے نے مزید لکھا کہ ’’عالمی یوم خواتین 2026 کے موقع پر ہم دنیا بھر کی خواتین کی ہمت، قیادت اور بے شمار خدمات کو خراج تحسین پیش کرتے ہیں۔‘‘ ملکارجن کھڑگے کے مطابق حقیقی ترقی تب آئے گی جب مساوات صرف ایک خواہش نہیں بلکہ ہر عورت کی عملی حقیقت بن جائے گی۔

کانگریس جنرل سکریٹری پرینکا گاندھی واڈرا نے بھی عالمی یوم خواتین کے موقع پر خواتین کو مبارکباد دی۔ انہوں نے سوشل میڈیا پلیٹ فارم ’ایکس‘ پر لکھا کہ ’’اس یوم خواتین پر دعا ہے کہ ہر عورت اپنی طاقت، اپنے حقوق اور مستقبل کو سنوارنے کی اپنی قوت کو پہچانے۔ آپ اہمیت رکھتی ہیں، آپ کی آواز اہم ہے اور آپ کے خواب اہمیت رکھتے ہیں۔‘‘

حزب اختلاف کے قائد راہل گاندھی نے کہا کہ ’’عالمی یوم خواتین کے موقع پر تمام خواتین کو دلی مبارکباد۔ آپ کی طاقت، ہمت اور خواب معاشرے کو ایک مثبت مستقبل کی طرف لے جاتے رہیں۔‘‘ ساتھ ہی انہوں نے کہا کہ ’’کیرالہ کی کچھ طالبات سے بات چیت انتہائی متاثر کن رہی۔ ان کی خود اعتمادی اور اپنے خوابوں پر یقین یہ ظاہر کرتا ہے کہ خواتین ہی تبدیلی کی اصل طاقت ہیں۔‘‘ راہل گاندھی نے سوشل میڈیا پلیٹ فارم پر ایک ویڈیو پوسٹ کی جس میں وہ طالبات کے ساتھ بات چیت کرتے ہوئے نظر آ رہے ہیں۔ وہ طالبات سے کہتے ہوئے نظر آ رہے ہیں کہ ’’میں ایک ایسے خاندان میں پلا بڑھا ہوں جہاں خواتین ہی گھر کی سربراہ تھیں۔ میرے خاندان کی سربراہ میری دادی تھیں اور میرے خاندان میں بالکل اس میز کی طرح ہمیشہ خواتین کی تعداد مردوں سے زیادہ رہی ہے۔‘‘

کانگریس نے بھی اپنے آفیشل ’ایکس‘ اکاؤنٹ سے عالمی یوم خواتین کے موقع پر خواتین کو مبارکباد پیش کی۔ پوسٹ میں کانگریس نے لکھا کہ ’’عالمی یوم خواتین کے موقع پر انڈین نیشنل کانگریس دنیا بھر کی خواتین کی طاقت، ہمت اور کامیابیوں کو سلام پیش کرتی ہے۔ ہم برابری، وقار، تحفظ اور زیادہ مواقع کے اپنے عزم کا اعادہ کرتے ہیں، اور ایسے مستقبل کی تعمیر کے لیے پرعزم ہیں جہاں ہر عورت قیادت کر سکے اور ترقی کر سکے۔‘‘