محمد رکن الدین نہ ہی اُردو کو زوال پذیر مانتے ہیں، نہ ہی جدید ٹیکنالوجی سے دور

محمد رکن الدین کا مختصر تعارف

محمد رکن الدین کی پیدائش 1990 میں بہار کے سیتامڑھی واقع حسن پور (بسبٹہ بازار، میجر گنج) میں ہوئی۔ والد محمد صفی اللہ انصاری کا پیشہ کاشتکاری ہے، جبکہ والدہ جمیلہ خاتون گھریلو ذمہ داریاں سنبھالتی ہیں۔ محمد رکن الدین نے ابتدائی تعلیم حسن پور کے ہی مدرسہ عربیہ رضا العلوم میں حاصل کی، جہاں ناظرہ قرآن ختم کیا اور اس کے بعد درس نظامی کی ابتدا ہوئی۔ اولیٰ اور ثانیہ کی تعلیم کے لیے انھوں نے فیض آباد کے روناہی واقع جامعہ اسلامیہ کا رخ کیا۔ اعظم گڑھ کے مایہ ناز دینی درسگاہ جامعہ اشرفیہ، مبارک پور سے فضیلت کی تعلیم حاصل کی۔ اتر پردیش مدرسہ ایجوکیشن بورڈ سے مولوی، منشی، کامل، عالم اور فاضل کے امتحانات پاس کیے۔ اسی دوران 2009 میں شبلی نیشنل کالج، اعظم گڑھ میں بی اے (اردو، عربی، تاریخ) میں داخلہ لیا۔ بعد ازاں 2011 میں ایم اے (اردو) کے لیے مشہور و مقبول جواہر لال نہرو یونیورسٹی، نئی دہلی میں داخلہ لیا۔ یہاں سے 2013 میں ایم فل (اردو) اور 2015 میں پی ایچ ڈی (اردو) کے لیے منتخب ہوئے۔ انھوں نے 2018 میں ’ایڈوانس ڈپلوما اِن ماس میڈیا اِن اردو‘ مکمل کیا، اور پھر 2020 میں جے این یو نے پی ایچ ڈی کی ڈگری تفویض کی۔

محمد رکن الدین ایک فعال شخصیت کے مالک ہیں جو تعلیم کے دوران مختلف سرگرمیوں سے جڑے رہے۔ انھوں جدید دور کی ضرورتوں کو سمجھتے ہوئے نئی ٹیکنالوجی سے بھی آشنائی حاصل کی اور درس و تدریس کو ایک نئی جہت دینے کی کوششوں میں مصروف ہیں۔ محمد رکن الدین نے 2021 سے 2023 تک وزارت داخلہ، حکومت ہند کے ماتحت ایک تربیتی ادارے میں بحیثیت ریسرچ ایسو سی ایٹ کام کیا، اور پھر انھیں جنوری 2024 میں دہلی یونیورسٹی کے ’ستیہ وَتی کالج‘ میں شعبۂ اردو میں بحیثیت اسسٹنٹ پروفیسر مستقل تقرری ملی۔ وہ 3 کتابوں ’سید تقی عابدی: بحیثیت نقاد و محقق‘، ’تحقیقی کاوشیں‘ اور ’2019 کی تخلیقی، تنقیدی اور تحقیقی نگارشات‘ کے مصنف بھی ہیں۔ چند کتابیں زیر طبع ہیں، جن میں ’مہجری محقق و نقاد، نئی بستیوں کے اردو شعبے‘ خاص طور سے قابل ذکر ہے۔ ’اردو اسپیکنگ یونین‘، ماریشس نے 2022 میں انھیں تشجیعی انعام سے نوازا ہے۔

————————————————