اگرتلہ: بی جے پی زیرقیادت مرکزی حکومت پر مہاتما گاندھی قومی دیہی روزگار گارنٹی ایکٹ (منریگا) کو کمزور کرنے اورمنصوبہ بند طریقے سے واپس لینے کا الزام لگاتے ہوئے اپوزیشن کانگریس نے اگرتلہ میں زبردست ریلی نکالی اور حکومت کی عوام مخالفت پالیسیوں کی تنقید کی۔ کانگریس کے جھنڈے اور بینر سے رنگین سوامی وویکانند میدان سے شروع ہونے والی اس ریلی میں پارٹی کے سینئر رہنماؤں کی قیادت میں کانگریس کے سینکڑوں حامیوں نے شرکت کی۔ حالانکہ لوک بھون (گورنر ہاؤس) کی طرف مارچ کرنے والے مظاہرین کو پولیس نے سخت سیکورٹی کے درمیان بدھ مندرعلاقے میں روک دیا۔
اس موقع پراجتماع سے خطاب کرتے ہوئے ریاستی کانگریس کے صدرآشیش کمارساہا، سابق وزیر اور ممبراسمبلی سدیپ رائے برمن اور ممبراسمبلی براجت سنہا سمیت پارٹی کے سینئر لیڈران نے منریگا کو منصوبہ بند طریقے سے کمزور کرنے کے لیے مرکزی حکومت پر سخت تنقید کی۔ صحافیوں سے بات کرتے ہوئے کانگریس ورکنگ کمیٹی کے رکن رائے برمن نے منریگا کو 2005 میں کانگریس کی قیادت والی یو پی اے حکومت کی طرف سے شروع کی گئی ایک ’تاریخی اسکیم‘ قرار دیا اور الزام لگایا کہ شہریوں کو روزگار مانگنے کی اجازت دینے والے مخصوص قوانین کو کمزور کردیا گیا ہے۔
انہوں نے کہا کہ اس اسکیم کے تحت روزگارملنا مشکل ہوتا جا رہا ہے۔ انہوں نے مزید کہا کہ پنچایتوں میں پہلے سے موجود مالیاتی اور منصوبہ بندی کے اختیارات کو کم کردیا گیا ہے اوراب ریاستوں کو 40 فیصد تک اخراجات برداشت کرنا پڑرہا ہے جس سے غریب ریاستوں پرمنفی اثر پڑ رہا ہے۔ رائے برمن نے کہا کہ جب ریاستیں اس بوجھ کو برداشت کرنے میں ناکام رہتی ہیں تو غریب دیہی عوام کو تکلیف ہوتی ہے۔ جو لوگ منریگا پر انحصار کرتے ہیں وہ روزی روٹی کے مواقع کھو دیتے ہیں۔ انہوں نے یہ بھی کہا کہ کانگریس نے گورنر کو ایک میمورنڈم پیش کیا ہے جس میں ایکٹ کے مناسب نفاذ کا مطالبہ کیا گیا ہے۔
کانگریس لیڈر نے تریپورہ قبائلی علاقہ جات خود مختار ضلع کونسل (ٹی ٹی اے اے ڈی سی)کے ضروری انتخابات سے قبل بی جے پی اور اس کی حلیف ٹیپرا موتھا پارٹی (ٹی ایم پی) کے درمیان جاری رسہ کشی کو بھی نشانہ بنایا اور اسے براہ راست طور پر’سیاسی ڈرامہ‘ قرار دیا۔ کانگریس لیڈروں نے کہا کہ ٹی ٹی اے اے ڈی سی انتخابات سے قبل سیاسی ڈرامہ بحثوں پر حاوی ہوا ہے۔ وہیں دیہی روزگار اور سماجی تحفظ جیسے اہم مسائل کو نظر انداز کیا جا رہا ہے۔ بعد ازاں 6 رکنی وفد نے لوک بھون میں گورنر اندرا سینا ریڈی نالو سے ملاقات کی اور اپنے مطالبات اور خدشات پر مشتمل ایک میمورنڈم پیش کیا۔ کانگریس نے روزگار اور روزی روٹی مشن (دیہی) کے لیے نئے نافذ شدہ ’وکست بھاری گارنٹی‘ کو واپس لینے کا مطالبہ کیا۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
