’واٹر مین‘ راجندر سنگھ نے بدعنوانی کو اصل سبب قرار دیا

پانی کے تحفظ کے ماہر اور راجندر سنگھ نے مدھیہ پردیش کے شہر اندور میں آلودہ پینے کا پانی استعمال کرنے سے ہونے والی اموات کو نظام کی پیدا کردہ آفت قرار دیتے ہوئے کہا ہے کہ اس سانحے کی اصل جڑ بدعنوانی ہے۔ ان کے مطابق اگر ملک کے سب سے صاف شہر کہلانے والے اندور میں ایسا المیہ پیش آ سکتا ہے تو دیگر شہروں میں پینے کے پانی کی صورتِ حال کا اندازہ لگانا مشکل نہیں۔

رامن میگسیسے ایوارڈ یافتہ راجندر سنگھ نے کہا کہ ٹھیکے دار لاگت بچانے کے لیے اکثر پینے کے پانی کی پائپ لائنیں نالیوں اور سیوریج لائنوں کے قریب بچھا دیتے ہیں، جس کے نتیجے میں آلودگی پھیلتی ہے۔ ان کے بقول بدعنوانی نے پورے نظام کو کھوکھلا کر دیا ہے اور اندور کا یہ سانحہ اسی ناکام اور بدعنوان نظام کا نتیجہ ہے۔