مغربی بنگال میں کانگریس کو ملی بڑی کامیابی، ترنمول کانگریس کی راجیہ سبھا رکن موسم نور نے تھاما ’ہاتھ‘

مغربی بنگال میں ہونے والے اسمبلی انتخاب سے قبل کانگریس کو بڑی کامیابی ملی ہے۔ ترنمول کانگریس (ٹی ایم سی) کی راجیہ سبھا رکن اور سابق رکن پارلیمنٹ موسم نور نے 3 جنوری کو کانگریس کا دامن تھام لیا ہے۔ وہ ابھی مغربی بنگال سے راجیہ سبھا رکن ہیں۔ کانگریس جنرل سکریٹری (مواصلات) جے رام رمیش، کانگریس جنرل سکریٹری (مغربی بنگال کے انچارج) غلام احمد میر، ریاستی کانگریس صدر سبھانکر سرکار اور لوک سبھا رکن عیسیٰ خان چودھری نے انہیں پارٹی میں شامل کرایا۔

اس موقع پر نامہ نگاروں سے خطاب کرتے ہوئے جے رام رمیش نے سینئر لیڈر اے بی اے غنی خان چودھری کی بھتیجی موسم نور کا استقبال کیا۔ انہوں نے کہا کہ آج بہت خوشی کا موقع ہے اور مغربی بنگال کا سیاسی موسم بدل رہا ہے۔ جے رام رامیش نے مرحوم اے بی غنی خان چودھری کو یاد کرتے ہوئے کہا کہ وہ کانگریس کے ستون تھے اور آج بھی لوگ ان کا نام عزت سے لیتے ہیں۔ ساتھ ہی انہوں نے کہا کہ مجھے خوشی ہے کہ ان کے خاندان کا رکن کانگریس کو مضبوط کرنے کے لیے متحد ہے۔ مغربی بنگال کے لوگ چاہتے ہیں کہ کانگریس مزید مضبوط ہو اور پارٹی اس امید پر پورا اترنے کے لیے جدوجہد کرتی رہے گی۔

مغربی بنگال کے انچارج غلام احمد میر نے موسم نور کی کانگریس پارٹی میں شمولیت کو کانگریس اور مغربی بنگال کے نوجوانوں کے لیے خوشی کا لمحہ قرار دیا ہے۔ انہوں نے کہا کہ 2026 کے پہلے ہفتہ میں ہی موسم نور کی گھر واپسی کانگریس کے لیے ایک اچھی علامت ہے۔ ان کی بنیاد اور ان کا خون کانگریس کا رہا ہے، اس پوری ریاست میں پارٹی کو نئی توانائی حاصل ہوگی۔

کانگریس میں شامل ہونے کے بعد موسم نور نے جذباتی ہوتے ہوئے کہا کہ یہ ان کے لیے عزت کی بات ہے کہ وہ پھر سے اپنے پریوار کانگریس میں لوٹ آئی ہیں۔ انہوں نے ترنمول کانگریس سے استعفیٰ دے دیا ہے اور 5 جنوری کو راجیہ سبھا کی رکنیت سے بھی رسمی طور پر استعفیٰ دے دیں گی۔ موسم نور نے بتایا کہ انہوں نے یہ فیصلہ اپنے بھائی اور کانگریس رکن پارلیمنٹ عیسیٰ خان چودھری کے ساتھ مل کر لیا ہے تاکہ غنی خان چودھری کی وراثت اور نظریہ کو ایک ساتھ مل کر مضبوط کیا جا سکے۔ ساتھ ہی انہوں نے کہا کہ مالدہ اور مغربی بنگال کے لوگ سیکولرزم، ترقی اور امن سے متعلق جس کانگریسی نظریے پر یقین رکھتے ہیں، وہ اسے آگے بڑھانا چاہتی ہیں۔