دلارچند یادو قتل معاملہ میں مکامہ سے جے ڈی یو رکن اسمبلی اننت سنگھ کو جھٹکا، سول کورٹ نے خارج کر دی ضمانت عرضی

دلارچند یادو قتل کے ملزم اور بہار کے مکامہ سے جے ڈے یو رکن اسمبلی اننت سنگھ کو عدالت سے بڑا جھٹکا لگا ہے۔ سول کورٹ نے ان کی ضمانت عرضی خارج کر دی ہے۔ اب اننت سنگھ پٹنہ ہائی کورٹ میں اسے چیلنج کریں گے۔ واضح رہے کہ اننت سنگھ کو بہار اسمبلی انتخابی مہم کے دوران 30 اکتوبر کو دلارچند یادو کے قتل کے الزام میں گرفتار کیا گیا تھا۔ اس کے بعد سے ہی اننت سنگھ بیور جیل میں بند ہیں۔

اننت سنگھ نے جیل میں رہتے ہوئے عدالت میں اپنی ضمانت عرضی داخل کی تھی۔ اننت سنگھ کی عرضی کو پٹنہ سول کورٹ نے خارج کر دیا ہے۔ اس کی وجہ سےاننت سنگھ کو ابھی جیل میں ہی رہنا ہوگا۔ دراصل اننت سنگھ پر بہار اسمبلی انتخاب کے دوران مکامہ میں جن سوراج پارٹی کے حامی دلارچند یادو کا قتل ہوا تھا، ان کے قتل کے الزام میں اننت سنگھ کو انتخاب کے دوران ہی پولیس نے گرفتار کر جیل بھیج دیا تھا۔

اننت سنگھ کے جیل جانے کے بعد جے ڈی یو کے حامیوں اور ان کے خاندان والوں نے ان کے حق میں انتخابی مہم چلائی تھی۔ بہار انتخاب کے نتائج میں جے ڈی یو کے امیدوار اننت سنگھ کو 28 ہزار سے زائد ووٹوں سے جیت حاصل ہوئی تھی۔ انہوں نے آر جے ڈی کی وینا دیوی کو جیل میں رہتے ہوئے شکست دے دی تھی۔ قتل کے الزام اور انتخابی مہم کے دوران جیل جانے کے باوجود اننت سنگھ کو لوگوں نے ایک بار پھر رکن اسمبلی کے طور پر منتخب کر لیا۔ بہر حال، جیل میں رہتے ہوئے انتخاب جیتنے والے اننت سنگھ نے عدالت کا دروازہ کھٹکھٹایا تھا، تاکہ انہیں کچھ راحت مل سکے۔ فی الحال عدالت کی جانب سے ان کی ضمانت عرضی خارج کر دی گئی ہے، جس کی وجہ سے ان کی مشکلات میں مزید اضافہ ہو گیا ہے۔