بھوجپوری اداکار کھیساری لال یادو چھپرا سے لڑیں گے الیکشن، آر جے ڈی نے بنایا امیدوار

بھوجپوری فلموں کے مشہور اداکار اور گلوکار کھیساری لال یادو اب سیاست کے میدان میں قدم رکھ رہے ہیں۔ راشٹریہ جنتا دل (آر جے ڈی) نے انہیں چھپرا اسمبلی نشست سے انتخاب لڑنے کے لیے ٹکٹ دیا ہے، جس کا اعلان کھیساری لال نے خود سوشل میڈیا پلیٹ فارم ایکس پر کیا۔ انہوں نے اپنے پیغام میں لکھا کہ وہ کوئی روایتی سیاستدان نہیں ہیں بلکہ عام عوام کے بیٹے ہیں، جو ہر طبقے کی آواز بننا چاہتے ہیں۔

کھیساری لال یادو نے کہا کہ سیاست ان کے لیے صرف کرسی کی دوڑ نہیں بلکہ ایک ذمہ داری ہے۔ وہ چاہتے ہیں کہ چھپرا کے ہر گھر تک ترقی پہنچے اور ہر دل کی آواز بنیں۔ ان کے مطابق وہ کھیت کھلیان سے جڑے ہیں اور نوجوانوں کے جوش و جذبے کی نمائندگی کرتے ہیں۔ ان کا ماننا ہے کہ سیاست عوام کی خدمت کا ذریعہ ہے نہ کہ ذاتی مفاد کا۔