15582 کروڑ کی 455 جائیدادیں جسٹس لودھا کمیٹی کے حوالے، ای ڈی کی بڑی کامیابی

ای ڈی کے مطابق یہ کارروائی پریوینشن آف منی لانڈرنگ ایکٹ، 2002 کے تحت کی گئی ہے۔ جاری مالی سال کے دوران ایجنسی نے مجموعی طور پر 26,324 کروڑ روپے مالیت کی جائیدادیں ضبط کی ہیں، جبکہ پی اے سی ایل معاملے میں اب تک کل ضبطی 27,030 کروڑ روپے تک پہنچ چکی ہے۔ ان میں ہندوستان کے ساتھ ساتھ آسٹریلیا میں موجود اثاثے بھی شامل ہیں۔

یہ معاملہ مرکزی تفتیشی بیورو (سی بی آئی) کی جانب سے درج کی گئی ایف آئی آر سے شروع ہوا تھا، جس میں پی اے سی ایل لمیٹڈ اور اس کے پروموٹرز پر لاکھوں سرمایہ کاروں کے ساتھ دھوکہ دہی کا الزام عائد کیا گیا تھا۔ تحقیقات کے مطابق کمپنی نے ملک بھر کے سرمایہ کاروں سے 68 ہزار کروڑ روپے سے زائد رقم ایک غیر قانونی اجتماعی سرمایہ کاری اسکیم کے تحت جمع کی، جس میں سے تقریباً 48 ہزار کروڑ روپے اب تک واپس نہیں کیے گئے۔