یو جی سی کے امتیاز مخالف ضوابط درست قدم، مگر بغیر خودمختار کمیٹی بے معنی: این ایس یو آئی

بیان میں کہا گیا ہے کہ این ایس یو آئی طویل عرصے سے اعلیٰ تعلیم کے اداروں میں ذات پر مبنی امتیاز کے خلاف مؤثر اقدامات کا مطالبہ کرتی رہی ہے اور یو جی سی کے حالیہ ضوابط اس سمت میں ایک اہم پیش رفت ہیں۔ تنظیم کے مطابق تعلیمی کیمپس میں مساوات اور انصاف کے قیام کے لیے اس طرح کے اقدامات ناگزیر ہیں۔

این ایس یو آئی نے اپنے بیان میں کہا ہے کہ مجوزہ کمیٹی صرف علامتی یا انتظامی نوعیت کی نہیں ہونی چاہیے۔ بیان کے مطابق کمیٹی میں درج فہرست ذاتوں، درج فہرست قبائل اور دیگر پسماندہ طبقات سے تعلق رکھنے والے طلبہ کی لازمی نمائندگی ہونی چاہیے۔ اس کے ساتھ ساتھ انہی طبقات سے تعلق رکھنے والے تدریسی عملے کو بھی کمیٹی میں شامل کیا جانا چاہیے۔