’ہندوستانی کمپنیاں جدت سے کامیاب، اجارہ داری سے نہیں‘

لوک سبھا میں قائد حزب اختلاف اور کانگریس کے سینئر لیڈر راہل گاندھی اس وقت کولمبیا کے دورے پر ہیں۔ راہل گاندھی نے جمعہ کو ہندوستانی دو پہیوں والی گاڑیاں تیار کرنے والی کمپنیوں بجاج، ہیرو اور ٹی وی ایس کی بیرون ملک کامیابی پر فخر کا اظہار کیا۔ انہوں نے کہا کہ بجاج، ہیرو اور ٹی وی ایس کو کولمبیا میں اتنا اچھا پرفارم کرتے دیکھ کر فخر ہو رہا ہے۔

راہل گاندھی نے جمعہ کو سوشل میڈیا پلیٹ فارم ایکس پر ایک تصویر شیئر کی، جس میں راہل گاندھی ایک بائیک کے ساتھ نظر آ رہے ہیں، جو بجاج کمپنی کی ہے۔ انہوں نے اس تصویر کو ایکس پر شیئر کرتے ہوئے لکھا، ’’بجاج، ہیرو اور ٹی وی ایس کو کولمبیا میں اتنا اچھا پرفارم کرتے دیکھ کر فخر ہو رہا ہے۔ یہ دکھاتا ہے کہ ہندوستانی کمپنیاں جدت سے کامیاب ہو سکتی ہیں، اجارہ داری سے نہیں۔ شاندار کام، مبارک ہو۔‘‘