گردابی طوفان ’مونتھا‘ نے آندھرا کے ساحل کو کیا پار، 3 افراد ہلاک، ہزاروں افراد محفوظ مقامات پر منتقل

آئی ایم ڈی نے ایک بیان میں بتایا کہ شدید گردابی طوفان مونتھا ساحل سے ٹکرانے کے بعد کمزور پڑ گیا ہے۔ یہ نظام پچھلے 6 گھنٹوں کے دوران تقریباً 10 کلومیٹر فی گھنٹہ کی رفتار سے شمال مغرب کی جانب بڑھا اور اب اس کی شدت گھٹ گئی ہے۔ تاہم کئی علاقوں میں تیز بارش اور آندھی کا سلسلہ بدستور جاری ہے۔

محکمہ نے بتایا کہ طوفان کے پیشِ نظر تقریباً 76 ہزار افراد کو محفوظ مقامات پر منتقل کیا گیا ہے، جب کہ حکومت نے 219 امدادی کیمپ قائم کیے ہیں۔ اس دوران آندھرا پردیش کے وزیراعلیٰ این چندرابابو نائیڈو نے ریئل ٹائم گورننس سسٹم کے تحت گاؤں اور وارڈ سیکریٹریٹ کے اہلکاروں سے ویڈیو کانفرنس کے ذریعے رابطہ کیا۔ نائیڈو نے بتایا کہ طوفان کا اثر نہ صرف ساحلی اضلاع بلکہ رائل سیما کے کچھ حصوں میں بھی محسوس کیا جا رہا ہے۔ انہوں نے ہدایت دی کہ متاثرہ علاقوں میں بجلی بحال کی جائے اور ملبہ فوری طور پر ہٹایا جائے۔