گائے کی جان بچانے کی کوشش میں 5 افراد جاں بحق، ایک کی حالت سنگین

مدھیہ پردیش کے گُنا میں ایک گائے کی جان بچانے کی کوشش میں 5 لوگوں کی زندگی چلی گئی۔ ایک شخص کی حالت سنگین بھی بتائی جا رہی ہے۔ ہلاکتوں کی وجہ اس کنویں میں موجود زہریلی گیس ہے، جس کی زد میں آ کر مہلوکین کا دم گھٹ گیا۔ گائے اسی کنویں میں گر گئی تھی، جس کو بچانے کی کوشش میں کئی جانیں چلی گئیں۔

واقعہ دھرناودا گاؤں میں منگل کی صبح تقریباً 10 بجے پیش آیا۔ موصولہ اطلاع کے مطابق کنواں آم کے باغ میں بنا ہوا ہے۔ منگل کی صبح ٹھیکیدار کے لوگ آم توڑنے پہنچے تھے، تبھی گائے کا ایک بچھڑا وہاں گھومتے پھرتے آیا اور کنویں میں گر گیا۔ اسے بچانے کے لیے یکے بعد دیگرے 6 افراد کنویں میں اترے۔ نیچے پہنچتے ہی سبھی کو سانس لینے میں دقت ہوئی اور دم گھٹنے لگا۔ یہ دیکھ کر چاروں طرف افرا تفری والا ماحول پیدا ہو گیا۔

لوگوں نے فوراً معاملے کی جانکاری ایس ڈی ایف آر ایف اور پولیس انتظامیہ کو دی۔ حادثہ کی خبر ملتے ہی کلکٹر کشور کمار کنیال، ایس پی انکت سونی، گیل کی سی آئی ایس ایف یونٹ، ایس ڈی ای آر ایف سمیت پولیس و انتظامیہ کی ٹیم موقع پر پہنچی اور ریسکیو مہم شروع کی۔ ایک ایک کر کنویں سے لاشوں کو باہر نکالا گیا اور اسپتال لے جایا گیا۔ گُنا کے کلکٹر کشور کمار کنیال نے بتایا کہ کنویں میں غالباً کاربن مونوآکسائیڈ گیس کا رساؤ ہوا ہے۔ لیکن حقیقت کا پتہ لیب سے ٹیسٹنگ کے بعد ہی چل پائے گا۔ ایس ڈی آر ایف ٹیم کے مطابق کنویں میں تقریباً 12 فیٹ پانی ہے۔ اس وجہ سے ریسکیو آپریشن میں دقتوں کا سامنا کرنا پڑا۔ ریسکیو مہم چلانے والے افراد آکسیجن سلنڈر لے کر کنویں میں اترے اور کھٹیا و رسّی کے سہارے سبھی 6 لوگوں کو کنویں سے باہر نکالا۔