کیا مسک اب نئی پارٹی بنائیں گے؟

امریکی سینیٹ نے منگل کو صدر ڈونالڈ ٹرمپ کے اخراجات کا ’بڑا خوبصورت بل‘ منظور کر لیا۔ ووٹنگ 18 گھنٹے سے زیادہ جاری رہی ۔ اس دوران سینیٹرز نے تقریباً ایک ہزار صفحات پر مشتمل اس بل میں متعدد ترامیم پیش کیں اور اس پر بحث کی۔ ووٹ برابر ہونے پر نائب صدر جے ڈی وینس نے فیصلہ کن ووٹ ڈال کر بل کو منظور کیا۔ واضح رہے تما م ڈیموکریٹس اور تین ریپبلکن ارکان نے بل کے خلاف ووٹ کیا۔

ٹرمپ نے اس بل کو ’’ایک بڑا خوبصورت بل‘‘ کا نام دیا ہے۔ اس کا مقصد 4.5 ٹریلین ڈالر کی لاگت سے اپنی پہلی مدت کے ٹیکس کٹوتیوں کو آگے بڑھانا ہے۔ اس کے علاوہ اس میں فوجی اخراجات میں اضافہ، لوگوں کی بڑے پیمانے پر ملک بدری کے عمل اور سرحدی حفاظت کے لیے فنڈز فراہم کرنے کا بھی انتظام ہے۔

ایک خبر رساں ادارے کے مطابق اس قانون سے اگلے دس سالوں میں امریکہ کے قومی قرضے میں 3.3 ٹریلین ڈالر سے زیادہ کا اضافہ ہو سکتا ہے۔ سینیٹ میں اس بل کی منظوری کو ٹرمپ انتظامیہ کے لیے ایک اہم قدم قرار دیا جا رہا ہے۔ انتظامیہ چاہتی ہے کہ یہ بل جمعہ تک قانون کی شکل اختیار کر لے تاکہ یوم آزادی سے پہلے اسے نافذ کیا جا سکے۔

تاہم اب یہ بل امریکی پارلیمنٹ کے ایوان زیریں یعنی ایوان نمائندگان میں جائے گا جہاں کچھ ریپبلکن ارکان پارلیمنٹ نے اس پر تشویش کا اظہار بھی کیا ہے۔ بل میں ایک تجویز ہے، جس کے تحت تقریباً 1 ٹریلین ڈالر کی صحت کی دیکھ بھال کی سبسڈی ختم کر دی جائے گی، جس سے لاکھوں غریب امریکی متاثر ہو سکتے ہیں۔

ٹیسلا کے مالک ایلون مسک نے دھمکی دی تھی کہ اگر ٹرمپ کا ‘بگ بیوٹیفل بل’ منظور ہوا تو وہ ایک نئی پارٹی کا آغاز کریں گے۔ مسک نے کہا کہ اگر ٹرمپ کے اخراجات کا بل منظور ہو جاتا ہے تو ‘امریکہ پارٹی’ فوری طور پر شروع کر دی جائے گی۔ ہمارے ملک کو ڈیموکریٹ ریپبلکن یونی پارٹی کے متبادل کی ضرورت ہے۔ ان کے اس بیان کے بعد یہ قیاس آرائیاں کی جا رہی ہیں کہ کیا اس سے ان دونوں کے درمیان بحث کا دوسرا دور شروع ہونے جا رہا ہے؟

ڈونالڈ ٹرمپ نے ٹروتھ سوشل پر لکھا، ‘ایلون مسک کو صدر کے لیے میری حمایت کرنے سے بہت پہلے معلوم تھا کہ میں ای وی مینڈیٹ کے سخت خلاف ہوں۔ یہ مضحکہ خیز ہے اور یہ ہمیشہ میری مہم کا ایک بڑا حصہ تھا۔ الیکٹرک کاریں ٹھیک ہیں، لیکن ہر کسی کو اسے خریدنے پر مجبور نہیں کیا جانا چاہیے۔’

ٹرمپ نے مزید لکھا، ‘ایلون کو تاریخ میں کسی بھی انسان سے زیادہ سبسڈی مل سکتی ہے، لیکن سبسڈی کے بغیر انہیں شاید اپنی دکان بند کرکے جنوبی افریقہ واپس جانا پڑے گا۔ کوئی راکٹ لانچ، سیٹلائٹ یا الیکٹرک کاروں کی پیداوار نہیں ہوگی، اور ہم بہت پیسہ بچائیں گے۔’