چترا میں ایئر ایمبولنس تباہ، کولکاتا اے ٹی سی سے آخری رابطہ، 7 افراد جان بحق

جھارکھنڈ کی راجدھانی رانچی سے دہلی کے لیے روانہ ہونے والی ریڈ برڈ ایوی ایشن پرائیویٹ لمیٹڈ کی ایک ایئر ایمبولنس پیر کی شام چترا ضلع کے سمریا تھانہ حلقہ کے کرماٹانڈ جنگل میں گر کر تباہ ہو گئی۔ سرکاری تصدیق کے مطابق حادثہ میں طیارہ پر سوار تمام 7 افراد جان بحق ہو گئے۔ یہ پرواز ایک شدید زخمی مریض کو بہتر علاج کے لیے دہلی منتقل کر رہی تھی۔

ڈائریکٹوریٹ جنرل آف سول ایوی ایشن کے مطابق بیچ کرافٹ سی 90 طیارہ نے ہندوستانی معیاری وقت کے مطابق شام 7 بج کر 11 منٹ پر رانچی کے برسا منڈا ہوائی اڈہ سے دہلی کے لیے اڑان بھری تھی۔ پرواز کے دوران شام 7 بج کر 34 منٹ پر کولکاتا فضائی ٹریفک کنٹرول سے اس کا رابطہ اچانک منقطع ہو گیا۔