پی وی نرسمہا راؤ کی برسی پر کانگریس قیادت کا خراجِ عقیدت، اقتصادی اصلاحات کو یاد کیا گیا

کانگریس کے قومی صدر ملکارجن کھڑگے نے سوشل میڈیا پلیٹ فارم ایکس پر اپنے پیغام میں کہا کہ نرسمہا راؤ کی قیادت میں ہندوستان نے اقتصادی اصلاحات کا ایک انقلابی دور شروع کیا، جس نے ترقی کی مضبوط بنیاد رکھی اور متوسط طبقے کی امیدوں کو نئی سمت دی۔ ان کے مطابق راؤ کے دور میں نہ صرف اقتصادی میدان میں بڑی پیش رفت ہوئی بلکہ خارجہ پالیسی اور قومی سلامتی کے شعبوں میں بھی اہم فیصلے کیے گئے۔

کانگریس پارٹی نے اپنے سرکاری ایکس ہینڈل پر جاری بیان میں کہا کہ پی وی نرسمہا راؤ ایک دور اندیش رہنما تھے، جنہوں نے مشکل سیاسی حالات میں بھی جمہوری اقدار کا دامن نہیں چھوڑا۔ پارٹی کے مطابق ان کی دانش مندانہ قیادت اور اصلاحاتی وژن آج بھی نئی نسل کے لیے رہنمائی کا ذریعہ ہے۔