پاسپورٹ اور پین کارڈ معاملہ میں عبداللہ اعظم کو الہ آباد ہائی کورٹ سے جھٹکا، دو عرضیاں خارج

الہ آباد ہائی کورٹ میں بدھ کے روز جسٹس سمیر جین کی سنگل بنچ نے فیصلہ سناتے ہوئے دونوں عرضیاں مسترد کر دیں۔ عبداللہ اعظم نے عدالت سے گزارش کی تھی کہ رامپور کی ایم پی-ایم ایل اے عدالت میں ان کے خلاف جاری مقدمات کی کارروائی کو منسوخ کیا جائے، تاہم عدالت نے ان کی دلیلوں کو مسترد کرتے ہوئے ٹرائل جاری رکھنے کا حکم دیا۔

الہ آباد ہائی کورٹ کے سینئر وکیل شرد شرما کے مطابق، یہ مقدمہ عبداللہ اعظم کے دو پین کارڈ اور ایک مبینہ جعلی پاسپورٹ سے متعلق ہے۔ عدالت نے اس معاملے پر یکم جولائی 2025 کو سماعت مکمل کر کے فیصلہ محفوظ کر لیا تھا، جو اب سنایا گیا ہے۔ اس فیصلے کے بعد اب عبداللہ اعظم کے خلاف رامپور کی عدالت میں مقدمات کی سماعت جاری رہے گی۔