ٹرمپ نے وہائٹ ہاؤس میں منائی دیوالی، وزیر اعظم مودی سے تجارت پر گفتگو اور امن کی بات چیت کا دعویٰ

ٹرمپ کے بیانات ایسے وقت سامنے آئے ہیں جب واشنگٹن اور نئی دہلی کے درمیان تجارتی کشیدگی برقرار ہے۔ روسی تیل کی خریداری کے جواب میں ٹرمپ حکومت نے ہندوستانی مصنوعات پر اضافی 25 فیصد ٹیرف عائد کیا ہے، جس سے مجموعی درآمدی شرح تقریباً 50 فیصد تک پہنچ گئی ہے۔

صدر ٹرمپ نے یہ بھی کہا کہ ان کی تجارتی حکمت عملی نے ممکنہ جنگوں کو روکا ہے۔ انہوں نے کہا، ’’میں نے آٹھ جنگوں کا ذکر کیا جن میں سے پانچ صرف تجارت اور محصولات سے جڑی تھیں۔ ہندوستان اور پاکستان بھی ایک بڑی کشیدگی کے دہانے پر تھے، میں نے انہیں فون کر کے خبردار کیا کہ جنگ کی صورت میں ہم تجارتی معاہدہ ختم کر دیں گے۔‘‘

تاہم، ہندوستانی حکام نے واضح کیا ہے کہ جنگ بندی کا فیصلہ دونوں ممالک کے ڈی جی ایم اوز کے درمیان براہِ راست بات چیت سے ہوا تھا، نہ کہ کسی تیسرے فریق کی مداخلت سے۔