ووٹ چوری کے خلاف ایم وی اے کی ریلی پر ممبئی پولیس کی قدغن، منتظمین کو قانونی کارروائی کا انتباہ

ممبئی: مہاراشٹر میں اپوزیشن اتحاد مہا وکاس اگھاڑی (ایم وی اے) کی جانب سے ووٹ چوری اور ووٹر لسٹ میں دھاندلی کے خلاف نکالی جانے والی ریلی کو ممبئی پولیس نے اجازت دینے سے انکار کر دیا ہے۔ پولیس نے اسے سکیورٹی اور ٹریفک وجوہات کی بنیاد پر مسترد کرتے ہوئے واضح کیا ہے کہ اگر بغیر اجازت مارچ یا اجتماع کیا گیا تو منتظمین کے خلاف قانونی کارروائی کی جائے گی۔

یہ ریلی، جسے ’ستیہ مارچ‘ کا نام دیا گیا تھا، ہفتے کی دوپہر شیواجی پارک سے آزاد میدان تک نکالی جانی تھی۔ ایم وی اے کے تحت شیوسینا (یو بی ٹی) کے سربراہ ادھو ٹھاکرے، این سی پی (شرد پوار گروپ) کے صدر شرد پوار اور مہاراشٹر نونرمان سینا (ایم این ایس) کے سربراہ راج ٹھاکرے اس مارچ کی قیادت کرنے والے تھے۔ اس ریلی کا مقصد ریاستی ووٹر لسٹ میں جعلسازی اور دہرے اندراج کے خلاف احتجاج درج کرانا تھا۔