’ووٹ چوری‘ پر سنسنی خیز انکشافات متوقع، کانگریس نے کہا- ’ہائیڈروجن بم لوڈنگ‘

راہل گاندھی نے اپنی تازہ پوسٹ میں آج کی پریس کانفرنس کا پوسٹر جاری کیا ہے، جس پر لکھا ہے، ’’دی ایچ فائلز — آج دوپہر 12 بجے میں ایک اور ’ووٹ چوری‘ پریس کانفرنس سے خطاب کروں گا، براہِ راست دیکھیں۔‘‘

اسی کے ساتھ کانگریس کے سرکاری اکاؤنٹ سے ایک ویڈیو شیئر کی گئی ہے جس کے کیپشن میں لکھا ہے، ’’ہائیڈروجن بم آ رہا ہے۔‘‘

ویڈیو میں راہل گاندھی ہلکے طنزیہ انداز میں کہتے ہیں، ’’ایٹم بم کا نام سنا ہے آپ نے؟ اس سے بڑا کیا ہوتا ہے؟ اس سے بڑا ہائیڈروجن بم ہوتا ہے۔ مہادیو پورہ میں ہم نے ایٹم بم دکھایا تھا، بی جے پی کے لوگوں تیار ہو جاؤ، ہائیڈروجن بم آ رہا ہے۔‘‘

راہل گاندھی اور کانگریس کی ان پوسٹس کے بعد سیاسی حلقوں میں ہلچل مچ گئی ہے۔ پارٹی ذرائع کے مطابق آج کی پریس کانفرنس میں ’ووٹ چوری‘ سے متعلق اہم انکشافات کیے جا سکتے ہیں، جبکہ سوشل میڈیا پر #ایچ_فائلز اور #ہائیڈروجن_بم تیزی سے موضوعِ بحث بن گئے ہیں۔