نتیش حکومت کے مفت بجلی اعلان پر کانگریس کا ردعمل، ’اسمارٹ میٹر کے بہانے عوام کو لوٹا، اب جواب دینے کا وقت‘

کانگریس لیڈر نے کہا کہ بہار میں اسمارٹ میٹر کے نام پر بجلی کے بلوں کو تین سے چار گنا تک بڑھا دیا گیا ہے اور اب مفت یونٹ کی آڑ میں عوام کو دوبارہ گمراہ کرنے کی کوشش کی جا رہی ہے۔ انہوں نے کہا کہ ریاست میں بجلی کی نجکاری کے بعد سے مسلسل شکایات موصول ہو رہی ہیں، عوامی احتجاج ہوئے لیکن حکومت نے اس پر کوئی توجہ نہیں دی۔

اکھلیش سنگھ نے دعویٰ کیا کہ پچھلے بیس سالوں میں نتیش حکومت نے صرف وعدے کیے، عملی ترقی صفر رہی۔ انہوں نے کہا کہ نتیش کمار کی قیادت میں بہار صحت، تعلیم اور صنعت جیسے اہم شعبوں میں ہمیشہ پیچھے رہا ہے اور حالیہ نیتی آیوگ کی رپورٹ بھی اسی کی گواہی دیتی ہے، جس کے مطابق بہار ملک کی 28 بڑی ریاستوں میں سب سے نچلے مقام پر ہے۔