منریگا کا نام بدلنے پر پرینکا گاندھی کی تنقید، کہا- ’حکومت کے وسائل اور پیسہ ضائع ہوگا‘

مہاتما گاندھی نیشنل رورل ایمپلائمنٹ گارنٹی ایکٹ (منریگا) کا نام تبدیل کیے جانے کی خبروں کے درمیان سیاسی حلقوں میں بحث تیز ہو گئی ہے۔ کانگریس کی رکن پارلیمنٹ پرینکا گاندھی نے اس مجوزہ فیصلے پر سوال اٹھاتے ہوئے کہا ہے کہ اس طرح کے اقدامات سے حکومت کے وسائل ضائع ہوتے ہیں اور اضافی مالی بوجھ بھی پڑتا ہے۔

پرینکا گاندھی نے کہا کہ وہ یہ سمجھنے سے قاصر ہیں کہ آخر نام بدلنے کے پیچھے سوچ کیا ہے، خاص طور پر اس لیے کہ اس اسکیم کا تعلق مہاتما گاندھی کے نام سے جڑا ہوا ہے۔ ان کے مطابق، کسی بھی اسکیم کا نام تبدیل کرنے کا مطلب صرف تختیاں بدلنا نہیں ہوتا بلکہ دفاتر، دستاویزات اور سرکاری ریکارڈ میں بڑے پیمانے پر تبدیلیاں کرنا پڑتی ہیں، جس پر خطیر رقم خرچ ہوتی ہے۔