لوک سبھا میں اوم برلا کے خلاف عدم اعتماد کی تحریک، گورو گوگوئی نے حکومت اور کارروائی کے طریقہ کار پر اٹھائے سوالات

نئی دہلی: لوک سبھا میں اسپیکر اوم برلا کے خلاف عدم اعتماد کی تحریک پیش کیے جانے کے بعد ایوان میں سیاسی گرما گرمی بڑھ گئی۔ بہار کے کشن گنج سے کانگریس کے رکن پارلیمان ڈاکٹر محمد جاوید نے یہ تحریک پیش کی، جس کے بعد اس پر بحث کا آغاز ہوا اور مختلف اراکین نے اپنی اپنی رائے پیش کی۔

تحریک پر بحث کے دوران کانگریس کے رکن پارلیمان گورو گوگوئی نے ایوان کی کارروائی کے طریقہ کار اور اسپیکر کے کردار پر کئی سوالات اٹھائے۔ انہوں نے کہا کہ جمہوریت میں پارلیمان وہ جگہ ہے جہاں ہر منتخب نمائندے کو اپنی بات رکھنے کا مساوی موقع ملنا چاہیے، لیکن موجودہ حالات میں ایسا نظر نہیں آ رہا۔