قتل کی کوشش کے الزام میں عآپ رکن اسمبلی چیتر وساوا گرفتار، اروند کیجریوال نے بی جے پی کو بنایا ہدف تنقید

گجرات کے ڈیڈیا پاڑا حلقۂ اسمبلی سے عام آدمی پارٹی (عآپ) کے رکن چیتر وساوا کو پولیس نے قتل کی کوشش کے الزام ہفتہ کو گرفتار کر لیا ہے۔ ان پر نرمدا ضلع کے ڈیڈیا پاڑا میں ایک تعلقہ پنچایت افسر پر مبینہ طور پر حملہ کے بعد قتل کی کوشش کا الزام ہے۔ یہ واقعہ ہفتہ کے روز پیش آیا تھا، پولیس نے اس تعلق سے اتوار کو اطلاع دی ہے۔ ڈیڈیا پاڑا تھانہ میں درج ایف آئی آر کے مطابق میٹنگ کے دوران وساوا نے مقامای سطح کی رابطہ کمیٹی ’آپنو تالوکو وائبرینٹ تالوکو‘ (اے ٹی وی ٹی) کے رکن کے عہدے پر ان کی جانب سے نامزد کیے گئے شخص کے نام پر غور و خوض نہیں کیے جانے پر اعتراض کیا اور مشتعل ہو گئے۔ وساوا نے مبینہ طور پر ساگبارا تعلقہ پنچایت کی ایک خاتون صدر کو نازیبا الفاظ کہنا شروع کر دیا۔

ایف آئی آر کے مطابق رکن اسمبلی نے شکایت کنندہ پر شیشہ کے گلاس سے حملہ کرنے کی بھی کوشش کی لیکن وہاں موجود پولیس اہلکاروں نے اسے ایسا کرنے سے روک دیا۔ ایف آئی آر میں کہا گیا ہے کہ جیسے ہی شیشہ کا گلاس ٹوٹا، رکن اسمبلی نے شیشہ کا ٹکڑہ اٹھا کر سنجے وساوا کی طرف بڑھا اور اسے جان سے مارنے کی دھمکی دی لیکن شکایت کنندہ کسی طرح فرار ہونے میں کامیاب ہوگیا۔ شکایت میں یہ بھی الزام لگایا گیا ہے کہ ارکن اسمبلی نے دفتر میں رکھی ایک کرسی کو بھی نقصان پہنچایا ہے۔ عآپ رکن اسمبلی کے خلاف ڈیڈیا پارہ پولیس اسٹیشن میں انڈین جوڈیشل کوڈ کی دفعہ 109 (قتل کی کوشش)، 79 (الفاظ، اشاروں کے ذریعہ کسی عورت کی عزت کی توہین)، 115 (2) (رضاکارانہ طور پر تکلیف پہنچانا)، 351 (3) (مجرمانہ دھمکی)، 352 (جان بوجھ کر توہین) اور 324 (3) (جائیداد کو نقصان پہنچانا) کے تحت ایف آئی آر درج کی گئی۔

دوسری جانب عآپ رکن اسمبلی کی گرفتاری پر پارٹی کے قومی کنویز اروند کیجریوال نے بی جے پی پر حملہ بولا ہے۔ انہوں نے سوشل میڈیا پلیٹ فارم ’ایکس‘ پر لکھا کہ ’’گجرات میں عآپ رکن اسمبلی چیتر وساوا کو گرفتار کر لیا۔ وِساودر ضمنی انتخاب میں عآپ کے ہاتھوں شکست کے بعد بی جے پی بوکھلائی ہوئی ہے۔ اگر انہیں لگتا ہے کہ اس طرح کی گرفتاریوں سے عآپ ڈر جائے گی تو یہ ان کی سب سے بڑی بھول ہے۔ گجرات کے لوگ اب بی جے پی کی غلط حکمرانی، غنڈہ گردی اور تانا شاہی سے پریشان ہو چکے ہیں، بی جے پی کو اب گجرات کے عوام جواب دیں گے۔‘‘