غیر منظم شعبہ خطرے میں، حکومت فوری مذاکرات کرے، کانگریس کا مطالبہ

نئی دہلی: کانگریس نے مرکز کی مودی حکومت کو خبردار کرتے ہوئے کہا ہے کہ اگر ملک کے غیر منظم شعبے سے وابستہ کروڑوں مزدوروں کے مسائل پر فوری توجہ نہ دی گئی تو یہ صورتحال ایک بڑے سماجی بحران کو جنم دے سکتی ہے۔

کانگریس کے غیر منظم ورکرز اینڈ ایمپلائز وِنگ کے صدر ڈاکٹر ادت راج نے جمعہ کو مرکزی وزیر محنت منسکھ منڈاویہ کو ایک خط لکھ کر ان مزدوروں کی حالتِ زار پر سخت تشویش کا اظہار کیا۔ انہوں نے کہا کہ ملک کے 90 فیصد مزدور غیر منظم شعبے سے تعلق رکھتے ہیں لیکن حکومت کی پالیسیوں میں ان کے وجود کو مسلسل نظر انداز کیا جا رہا ہے۔