غزہ میں صاف پانی، ایندھن اور طبی سامان کی شدید قلت، بیماریوں میں خطرناک اضافہ: اقوام متحدہ

ایک مثبت پیش رفت کے طور پر، عالمی ادارہ صحت (ڈبلیو ایچ او) نے اطلاع دی ہے کہ 2 مارچ کو اسرائیل کی جانب سے مکمل ناکہ بندی کے بعد پہلی بار طبی سامان غزہ پہنچایا گیا ہے۔ کیرم شالوم (کرام ابو سالم) کراسنگ سے نو ٹرکوں کے ذریعے ضروری طبی سامان، 2,000 یونٹ خون اور 1,500 یونٹ پلازما لایا گیا، جو کہ خان یونس کے ناصر میڈیکل کمپلیکس کے کولڈ اسٹوریج میں محفوظ کیا گیا ہے۔

اگرچہ ڈبلیو ایچ او نے اس پیش رفت کو سراہا ہے لیکن ادارے نے واضح کیا ہے کہ یہ فراہمی موجودہ ضروریات کے مقابلے میں انتہائی ناکافی ہے۔ خاص طور پر ان اسپتالوں میں جہاں شدید زخمیوں کا دباؤ ہے، جن میں اکثریت ان افراد کی ہے جو اسرائیلی فوج کی زیرِ نگرانی خوراک کی تقسیم کے مقامات پر زخمی ہوئے۔