غزہ میں جنگ بندی، یرغمالیوں کی رہائی اور عارضی غیر سیاسی حکومت کی تجویز

امریکی صدر ڈونلڈ ٹرمپ نے غزہ کے لیے ایک 20 نکاتی امن منصوبہ پیش کیا ہے جس کا مقصد قریب دو برس سے جاری اسرائیل اور حماس کے درمیان خونریز جنگ کو فوری طور پر ختم کرانا ہے۔ منصوبے کے مطابق دونوں فریقوں کے درمیان اگر اتفاق رائے قائم ہو جائے تو فوجی کارروائیاں فی الفور روک دی جائیں گی اور اسی دوران یرغمالیوں کے مرحلہ وار تبادلے کا عمل شروع ہوگا۔

منصوبے کے تحت اسرائیل کو 72 گھنٹے کے اندر اپنے یرغمالیوں، خواہ وہ زندہ ہوں یا ان کے اجساد، واپس مل جائیں گے۔ اس کے بدلے میں اسرائیل 250 ایسے فلسطینیوں کو رہا کرے گا جو عمر قید کی سزا کاٹ رہے ہیں، جبکہ 7 اکتوبر 2023 کے بعد سے غزہ میں گرفتار 1700 فلسطینیوں کو بھی رہا کیا جائے گا۔ اس کے ساتھ یہ شرط رکھی گئی ہے کہ ہر ایک اسرائیلی یرغمالی کی لاش کی واپسی پر 15 فلسطینیوں کی میتیں بھی واپس کی جائیں گی۔