غالب اکیڈمی میں عالمی یوم اُردو کے موقع پر تقریب کا انعقاد

اُردو ڈیولپمنٹ آرگنائزیشن کے قومی صدر اور اُردو زبان کے محسن ڈاکٹر سید احمد خاں نے اپنے خطاب میں کہا، ’’اُردو کمزور زبان نہیں، یہ ہندوستان کی سرزمین میں پیدا ہوئی اور اس کے فروغ میں ہر مذہب و طبقے کے لوگوں نے اپنا کردار ادا کیا ہے، ماضی میں بھی اور آج بھی۔‘‘

انہوں نے مزید کہا کہ بدلتے وقت کے ساتھ اُردو زبان میں روزگار کے نئے مواقع پیدا ہوئے ہیں۔ البتہ افسوس اس بات کا ہے کہ شمالی ہند کے لوگ اُردو کے تئیں احساسِ کمتری میں مبتلا ہو گئے ہیں، جبکہ مہاراشٹر، کرناٹک اور تلنگانہ جیسی ریاستوں میں بڑی تعداد میں اُردو اسکول قائم ہیں جو اس زبان کی ترویج میں اہم کردار ادا کر رہے ہیں۔