عوام کے سوال پر خاموش ہو گئے بی جے پی امیدوار، لوگوں نے گاؤں میں گھسنے سے روکا!

بہار اسمبلی انتخاب کے پیش نظر سیاسی سرگرمیاں عروج پر ہیں۔ سبھی پارٹیوں کے امیدوار اپنے اپنے اسمبلی حلقہ میں زور و شور سے تشہیری مہم چلا رہے ہیں۔ لیکن کئی مقامات پر امیدواروں کو عوام کی ناراضگی کا بھی سامنا کرنا پڑ رہا ہے۔ ایسا ہی ایک معاملہ بھبھوا اسمبلی حلقہ میں سامنے آیا ہے، جہاں بی جے پی امیدوار بھرت بِند کو کٹرا کی عوام نے گاؤں میں داخل ہونے سے روک دیا۔

میڈیا رپورٹس کے مطابق بھبھوا اسمبلی حلقہ کے کٹرا گاؤں میں بی جے پی امیدوار اور سابق رکن اسمبلی بھرت بِند کی تشہیری مہم کے دوران ہنگامہ ہو گیا۔ بھرت کا راستہ کچھ نوجوانوں نے گاؤں میں داخل ہوتے وقت روک لیا اور ان سے سوال و جواب شروع کر دیا۔ لوگوں کے سوال سے بھرت بچنے کی کوشش کرتے نظر آئے، لیکن عوام کی بھیڑ نے انھیں آگے بڑھنے سے روک دیا۔ اس واقعہ کی ویڈیو سوشل میڈیا پر وائرل ہو رہی ہے۔